រាជធានី​ភ្នំពេញ​៖ អគ្គិភ័យបានឆាបឆេះ ទីលានបាញ់កាំភ្លើងភ្នំពេញយ៉ាងសន្ធោសន្ធៅ បង្កការភ្ញាក់ផ្អើលដល់សមត្ថកិច្ចមូលដ្ឋាន និងកម្លាំងជំនាញ​នាយដ្ឋាន​នគរបាល​បង្ការ​ពន្លត់​អគ្គិភ័យ​ និង​សង្គ្រោះ​ នៃអគ្គស្នងការដ្ឋាននគរបាលជាតិ ដឹកនាំដោយផ្ទាល់ ដោយឯកឧត្តម ​ឧត្តមសេនីយ៍ឯក នេត វន្ថា ប្រធាន​នាយដ្ឋាន​នគរបាល​បង្ការ​ពន្លត់​អគ្គិភ័យ និង​សង្គ្រោះ​ នៃអគ្គស្នងការដ្ឋាននគរបាលជាតិ កម្លាំង ការិយាល័យល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ដឹកនាំដោយលោក វរសេនីយ៍ឯក ព្រហ្ម យ៉ន នាយការិយាល័យ ដឹកនាំកម្លាំងជាច្រើននាក់ និងរថយន្តពន្លត់អគ្គិភ័យជាច្រើនគ្រឿងចុះទៅអន្តរាគមន៍បាញ់ពន្លត់ ។

ហេតុការណ៍នេះបានកើតឡើងកាលពីវេលាម៉ោង ១១និង០០​ នាទីព្រឹក ថ្ងៃអាទិត្យ ៤កើត ខែបុស្ស ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៤ ខែមករា ឆ្នាំ២០២៤ នៅចំណុចទីលានបាញ់កាំភ្លើងភ្នំពេញ ដែលស្ថិតនៅ ភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ​ ។

សមត្ថកិច្ចបានឲ្យដឹងថា ម្ចាស់ទីតាំង​ ព្រំ ធា ភេទ​ ប្រុស អាយុ ៦៦​ ឆ្នាំ ជនជាតិ ខ្មែរ​ មុខរបរ​ ទីព្រឹក្សាក្រសួងមហាផ្ទៃ ហើយការឆាបឆេះនេះ បណ្ដាល​មក​ពីការ​ឆ្លងចរន្តអគ្គិសនី ឆេះទីតាំងថ្មប្រក់ស័ង្កសីទំហំ ២៣ម៉ែត្រx ៧៧ម៉ែត្រ ឆេះផ្នែកខាងក្រោយនៃទីលានបាញ់កាំភ្លើងទំហំ ១៤ម៉ែត្រx ២៣ម៉ែត្រ អស់មួយផ្នែកខាងក្រោយ ហើយពុំបានឆេះរាលដាលដល់អ្នកក្បែរខាងឡើយ ។

ជុំវិញករណីនេះ កងកម្លាំង​បង្ការ​ពន្លត់​អគ្គិភ័យ​និង​សង្គ្រោះ​ បាន​ប្រើ​ប្រាស់​រថយន្ត​របស់​ការិយាល័យ​អគ្គិភ័យ​ចំនួន ១៣​ គ្រឿង ប្រើប្រាស់ទឹកអស់ចំនួន ៥២​ រថយន្ត​ ស្មើរនឹង ២០៨​ ម៉ែត្រគូប និងមាន រថយន្តជំនួយអន្តរាគមន៍ ពីខាង រថយន្តអគ្គិភ័យ​នាយដ្ឋាន​នគរបាល​បង្ការ​ពន្លត់​អគ្គិភ័យ​ និង​សង្គ្រោះ​ ចំនួន ០២​ គ្រឿង ប្រើប្រាស់ទឹកអស់ចំនួន ០៤​ រថយន្ត​ ស្មើនឹង ១៦​ ម៉ែត្រគូប, រថយន្តអគ្គិភ័យបញ្ជាការដ្ឋានពិសេសចំនួន ០៣​ គ្រឿង ប្រើប្រាស់ទឹកអស់ចំនួន ៣០​ រថយន្ត​ ស្មើនឹង ១២០ម៉ែត្រគូប និងរថយន្តអគ្គិភ័យក្រុមហ៊ុនស្រាបៀរកម្ពជាចំនួន ០១​ គ្រឿង ប្រើប្រាស់ទឹកអស់ចំនួន ០១​ រថយន្ត​ ស្មើនឹង ០៦ម៉ែត្រគូប រហូតរលត់ទៅវិញ នៅវេលា​ម៉ោង ១រសៀល ថ្ងៃដដែល ៕ អែល មេសា