ខេត្តតាកែវ ៖ ដើម្បីបង្កើតភាពស្និទ្ធស្នាលបន្ថែម រវាងថ្នាក់ដឹកនាំមូលដ្ឋាន និងមន្ត្រីរាជការមូលដ្ឋាន និងក្រោមពាក្យស្លោក« កីឡា រស់ក្រោមសន្តិភាព» នៅព្រឹកថ្ងៃអាទិត្យ ទី១៤ ខែមករា ឆ្នាំ២០២៤ នេះ មានការរៀបចំការប្រកួតបាល់ទាត់មិត្តភាព រវាងក្រុមកីឡាបាទីសន្តិភាព ដឹកនាំដោយឯកឧត្តម សួង ចាន់ថន មេធាវីរាជរដ្ឋាភិបាលកម្ពុជា និងក្រុម Gold Sports Club ដឹកនាំដោយលោកឧត្តមសេនីយ៍ទោ សុខ ណុប អនុប្រធាននាយកដ្ឋានចរាចរណ៍ និងសណ្តាប់ធ្នាប់ (អតីតក្រុម ERA) ។

កម្មវិធីការប្រកួតបាល់ទាត់នាពេលនេះ ក៏មានការអញ្ជើញចូលរួមទស្សនា ជាគណៈអធិបតី ពីលោក ខាន់ សុខា អភិបាលរងខេត្តតាកែវ លោកឧកញ៉ា គង់ ចាន់ដេត លោកវរសេនីយ៍ឯក ទូច ប៊ុនជួន ស្នងការរងខេត្ត និងលោក អ៊ូ សុខជា ប្រធានក្រុមប្រឹក្សាស្រុក ឯកឧត្តម លោកជំទាវ អស់លោក លោកស្រី បងប្អូន កូនក្មួយ ចូលរួមទស្សនាដោយសេរី សប្បាយរីករាយ ក្នុងទីលានប្រកួត ដែលស្ថិតនៅក្នុងអនុវិទ្យាល័យ ចន្ទ សារុន ពោធិញាណ ឃុំត្រពាំងសាប ស្រុកបាទី ខេត្តតាកែវ។

ការប្រកួតនេះ ប្រព្រឹត្តិទៅរលូន និងបញ្ចប់ក្នុងលទ្ធផល ក្រុមបាទីសន្តិភាព រកបាន៦គ្រាប់ ខណៈក្រុម Gold Sports Club រកបានលទ្ធផល៤គ្រាប់ ។

ជាកិច្ចចុងបញ្ចប់កម្មវិធី គណ:អធិបតី កីឡាករ បងប្អូន ក៏បានអញ្ជើញចូលរួមពិសារអាហារសាមគ្គីជាមួយគ្នា ដោយភាតរភាព និងស្និទ្ធស្នាលបំផុត៕ អែល វិចិត្រ