រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចម៉ូតូរបស់បងប្អូនប្រជាពលរដ្ឋនៅវាលស្រែ ហើយរត់គេចខ្លួន ផ្អើលអស់ប្រជាពលរដ្ឋ និងសមត្ថកិច្ចនគរបាលប៉ុស្តិ៍ពងទឹក រួមទាំងនគរបាលនៃអធិការដ្ឋាននគរបាលខណ្ឌដង្កោ ដេញធ្វើការចាប់ខ្លួនបានយ៉ាងប្រផាប់ប្រភីង ។

ហេតុការណ៍នេះបានកើតឡើងកាលពីវេលាម៉ោង១២និង ៣០នាទីថ្ងៃត្រង់ ទី១៧ ខែមករា ឆ្នាំ២០២៤ នៅចំណុចវាលស្រែ ស្ថិតនៅភូមិឃ្លះសណ្តាយ សង្កាត់ពងទឹក ខណ្ឌដង្កោ។

សមត្ថកិច្ចបានឲ្យដឹងថា ជនសង្ស័យឈ្មោះ នុត ដាវី ភេទប្រុស អាយុ៣៣ឆ្នាំ ជនជាតិខ្មែរ មុខរបរ និងស្នាក់នៅ មិនពិតប្រាកដ ប្រព្រឹត្តល្មើសនៅចំណុចមុខផ្ទះលេខ៩៩ ផ្លូវបេតុង ស្ថិតនៅភូមិស្រែញរ៍ សង្កាត់ពងទឹក ខណ្ឌដង្កោ។

ក្នុងនោះវត្ថុតាងចាប់យក៖ ម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០២១ ពាក់ផ្លាកលេខភ្នំពេញ1IS-6201, សោរខ្សៀលេខ៨ ចំនួន០១, តួណឺវីស ចំនួន០១, កូនសោរម៉ូតូ ចំនួន០១, ទូរស័ព្ទដៃម៉ាកវីវ៉ូ ពណ៌ខៀវ, កាបបូបលុយពណ៌ខ្មៅ ចំនួន០១, ស្កុតបិទលេខ៨ ចំនួន០១, កាតចាក់វ៉ាក់សាំងឈ្មោះ ណប់ សុភា ចំនួន០១សន្លឹក ។

បច្ចុប្បន្នជនសង្ស័យខាងលើ កម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕ អែល វិចិត្រ