រាជធានីភ្នំពេញ ៖ ពិតជាហ៊ានមែន! ជនសង្ស័យចំនួន៣នាក់ បានជិះម៉ូតូមួយគ្រឿង ឌុបគ្នាមកចូលធ្វើសកម្មភាព លួចម៉ូតូរបស់ប្រជាពលរដ្ឋ ដែលរស់នៅតាមបន្ទប់ជួល បានសម្រេច ម្តងដល់ទៅ២គ្រឿង គេចខ្លួនបាត់ស្រមោល ។
ហេតុការណ៍នេះកើតឡើងនៅវេលាម៉ោង ៣ទៀបភ្លឺ ឈានចូលថ្ងៃទី១៨ ខែមករា ឆ្នាំ២០២៤ នៅចំណុច ផ្ទះជួល ផ្លូវលំ ក្នុងភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ ។
ជនរងគ្រោះមានឈ្មោះ មឿន វ៉ាន់ថា ភេទប្រុស អាយុ៣១ឆ្នាំ មុខរបរបើករថយន្ត ស្នាក់នៅផ្ទះជួល ផ្លូវលំ ក្នុងភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ បានបញ្ជាក់នៅក្នុងពាក្យបណ្តឹងថា មុនពេលកើតហេតុ កាលពីថ្ងៃទី១៧ ខែមករា ឆ្នាំ២០២៤ វេលាម៉ោង១១យប់ គាត់បានចេញពីកន្លែងធ្វើការត្រឡប់មកផ្ទះជួលវិញ ដែលជាផ្ទះកើតហេតុខាងលើ បានដាក់ម៉ូតូ២គ្រឿងនៅបន្ទប់ជួល ដោយបានចាក់សោរយ៉ាងត្រឹមត្រូវ ហើយក៏ចូលបន្ទប់សម្រាកដូចរាល់ដង ។ លុះដល់ថ្ងៃទី១៨ ខែមករា ឆ្នាំ២០២៤ វេលាម៉ោង៤ គាត់បានក្រោកពីដំណេក ហើយបើកបន្ទប់ជួល ស្រាប់តែបាត់ម៉ូតូគាត់ទាំង២គ្រឿងនោះតែម្តង ក៏ប្រញាប់ឆែកកាមេរ៉ាសុវត្ថិភាព ឃើញត្រូវបានជនសង្ស័យ៣នាក់ ធ្វើសកម្មភាពលួចយកទៅបាត់ ដែលមានភិនភាគ ដូចក្នុងវីដេអូកាមេរ៉ាសុវត្ថិភាព បានបង្ហាញនេះស្រាប់ ។
សូមបញ្ជាក់ថា ម៉ូតូរបស់ជនរងគ្រោះទាំង២គ្រឿង ដែលត្រូវចោរលួចទៅបាត់នេះ ទី១ គឺម៉ាកហុងដាសេ១២៥ ពណ៌ក្រហម ពាក់ស្លាកលេខ ភ្នំពេញ 1JS-8852 ស៊េរីឆ្នាំ២០២២ (ជាម៉ូតូបង់គេរំលោះទៀត) និងម៉ូតូទី២ ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ភ្នំពេញ 1FQ-3840 ។
ក្រោយកើតហេតុជនរងគ្រោះក៏បានទៅដាក់ពាក្យបណ្តឹងនៅប៉ុស្តិ៍រដ្ឋបាលសង្កាត់ទួលសង្កែទី២ផងដែរ ដើម្បីឲ្យសមត្ថកិច្ចជំនាញ ជួយបើកការស្រាវជ្រាវ តាមចាប់ក្រុមចោរខាងលើនេះ យកមកចាត់ការតាមច្បាប់ឲ្យខាងតែបាន ៕ នុច
