រាជធានីភ្នំពេញ ៖ អគ្គិភ័យឆាបឆេះផ្ទះ មួយកន្លែងយ៉ាងសន្ធោសន្ធៅ បានបង្កការភ្ញាក់ផ្អើលជាខ្លាំង នៅវេលាម៉ោង ៤និង៣០នាទីល្ងាច ថ្ងៃទី១៨ ខែមករា ឆ្នាំ២០២៤ ដែលស្ថិតនៅចំណុចផ្ទះលេខ១៧៦ ផ្លូវ២០១១ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្រោយពីទទួលបានព័ត៏មានពីប្រជាពលរដ្ឋរាយការណ៍តាមរយៈលេខទូរស័ព្ទ 666 ថា មានករណីអគ្គិភ័យកំពុងឆាបឆេះផ្ទះ មួយកន្លែងនៅខណ្ឌសែនសុខ ភ្លាមៗនោះ លោកវរសេនីយ៍ឯក ព្រហ្ម យ៉ន ក៏បានបញ្ជាទៅរថយន្តពន្លត់អគ្គិភ័យដែលនៅក្បែរទីតាំងកើតហេតុខាងលើ ធ្វើការចេញជួយអន្តរាគមន៍ ដើម្បីបាញ់ទឹកទប់ស្កាត់មិនឲ្យរាលដាលដល់ផ្ទះប្រជាពលរដ្ឋក្បែរខាងទៀត។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានបន្តថា ចំពោះកិច្ចប្រតិបត្តិការខាងលើនេះ កម្លាំងជំនាញបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ចំនួន០៦គ្រឿង ប្រើប្រាស់ទឹកអស់០៣ឡាន ស្មើរនឹង១២ម៉ែត្រគូប។ ចំពោះប្រភេទសំណង់ខាងលើនេះ គឺជា ថ្មបេតុង ទំហំ (៤០ម៉ែត្រ x ៤០ម៉ែត្រ) ក្នុងនោះបណ្តាលឲ្យឆេះបន្ទប់ស្តុកសម្ភារៈ ទំហំ (៤ម៉ែត្រ x ៨ម៉ែត្រ) ចំនួន០១បន្ទប់ រួមទាំងឆេះសម្ភារៈក្នុងបន្ទប់អស់ទាំងស្រុង និងពុំបានឆេះរាលដាលដល់ផ្ទះអ្នកជិតខាងឡើយ។
ដោយឡែក ករណីខាងលើ ត្រូវបានសមត្ថកិច្ចជំនាញរបស់យើង ធ្វើការគ្រប់គ្រងបានទាំងស្រុងនៅម៉ោង ៥និង០០នាទីល្ងាចនាថ្ងៃខែឆ្នាំដដែល ចំពោះមូលហេតុដែលបណ្តាលឲ្យមានគ្រោះអគ្គិភ័យនេះ បណ្តាលមកពីការឆ្លងចរន្តអគ្គីសនី៕
