រាជធានីភ្នំពេញ ៖ លោក​យាយ​ម្នាក់ ត្រូវបានភ្លើងឆេះស្លាប់យ៉ាងរន្ធត់ ក្រោមកម្តៅរាប់ម៉ឺនអង្សារ ក្នុង​ហេតុការណ៍​អគ្គីភ័យ​ដែលឆាបឆេះផ្ទះមួយកន្លែងនៅវេលាម៉ោង​ ៥និង១០ នាទីល្ងាច ថ្ងៃទី១៩ ខែមករា ឆ្នាំ២០២៤ នៅចំណុចផ្ទះលេខ ១៧ ផ្លូវបេតុង៩២ ក្នុង​ភូមិ​ច្រេះ​ សង្កាត់​គោក​ឃ្លាង​ ខណ្ឌ​សែនសុខ​ រាជធានីភ្នំពេញ​។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ។

សមត្ថកិច្ចបានឲ្យដឹងថា ម្ចាស់ទីតាំងមានឈ្មោះ​ ឆាយ អ៊ាន ភេទ ប្រុស អាយុ ៨៥​ ឆ្នាំ ជនជាតិ ខ្មែរ មុខរបរ​ លក់ដូរ ដោយមូលហេតុនៃការឆាបឆេះយ៉ាងសន្ធោសន្ធៅនេះ មន្ត្រី​ជំនាញ​កំពុងបន្ត​ការស្រាវជ្រាវ ។

ក្នុងហេតុកាណ៍នេះក៏បានឆេះសំណង់ ថ្មប្រក់សង្កសីទំហំ ០៥ម៉ែត្រx១២ម៉ែត្រ ជាប្រភេទផ្ទះថ្មប្រក់ស័ង្កសីអស់មួយផ្នែកខាងក្រោម រួមមានម៉ូតូចំនួន ០២​ គ្រឿង និងសម្ភារៈអស់ទាំងស្រុង ហើយពុំបានឆេះរាលដាលដល់អ្នកក្បែរខាងឡើយ តែគួរឲ្យសោកស្តាយ ក្នុងហេតុការណ៍នេះ ក៏បានផ្តាច់ជីវិតលោកយាយម្នាក់ ឈ្មោះ គ្រៀល អៀង អាយុ ៨៥​ ឆ្នាំ ផងដែរ ។

ដោយឡែកចំពោះការបាញ់ពន្លត់វិញ កងកម្លាំង​បង្ការ​ពន្លត់​អគ្គិភ័យ​និង​សង្គ្រោះ​ បាន​ប្រើប្រាស់​រថយន្ត​របស់​ការិយាល័យ​អគ្គីភ័យ​ស្នងការដ្ឋាន​នគរបាល​រាជធានី​ភ្នំពេញ​ចំនួន ១១​ គ្រឿង ប្រើប្រាស់ទឹកអស់ចំនួន ១១​ រថយន្ត​ ស្មើរនឹង ៤៤​ ម៉ែត្រគូប ទើបរលត់ទៅវិញនៅម៉ោង ៥និង៥៥ នាទីល្ងាច នាថ្ងៃ ខែ ឆ្នាំដដែល ៕