ខេត្ត​ព្រះសីហនុ​៖ រថយន្ត MERCEDES BENZ V250​ ត្រូវបានអគ្គិភ័យឆេះលេបត្របាក់យ៉ាងសន្ធោសន្ធៅ កាលពីវេលាម៉ោង ១០និង៣០​ នាទីព្រឹក​ ថ្ងៃទី២៣ ខែមករា ឆ្នាំ២០២៤ ស្ថិតនៅចំណុចក្រុម១​ ភូមិ៦ សង្កាត់លេខ៤ ក្រុង​ព្រះសីហនុ​ ខេត្តព្រះសីហនុ ។

សមត្ថកិច្ចបានឲ្យដឹងថា ម្ចាស់ឡានរងគ្រោះមានឈ្មោះ សួរ ឌីណា ភេទ​ ប្រុស អាយុ​ ៤១​ ឆ្នាំ ជនជាតិខ្មែរ មានស្រុកកំណើតនៅ​ សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ ខណៈរថយន្តដែលឆេះនេះ ម៉ាក MERCEDES BENZ V250​ ពណ៌ ស ដែលមានស្លាកលេខ ភ្នំពេញ​ 2BN 5585 ត្រូវបានភ្លើងឆេះខ្ទេចអស់ទាំងស្រុង​ ។

ចំពោះមូលហេតុ សមត្ថកិច្ចបញ្ជាក់ថា បណ្ដាល​មក​ពី​ឆ្លងចរន្តភ្លើង​ ក្នុងរថយន្តបង្ករជាអគ្គិភ័យតែ​ម្តង តែគ្មាននរណាម្នាក់រងរបួសនោះទេ។

ករណីអគ្គិភ័យខាងលើនេះកងកម្លាំង​ការិយាល័យ​បង្ការ​ពន្លត់អគ្គិភ័យនិង​សង្គ្រោះ​ របស់ស្នងការដ្ឋាននគរបាលខេត្តព្រះសីហនុ បានចេញរថយន្តពន្លត់អគ្គិភ័យចំនួន ០១ គ្រឿង និងបានប្រើប្រាស់ទឹកអស់ចំនួន ០១​ រថយន្ត​ ទើបរលត់ទៅវិញទាំងស្រុង ៕ អែល ​វិចិត្រ