ខេត្តតាកែវ ៖ យោងតាមផេកផ្លូវការរបស់ អធិការដ្ឋាននគរបាលស្រុកបាទី បានឲ្យដឹងថា សូមជម្រាបជូនសាធារណៈជនអោយបានជ្រាបថា: ករណីគ្រោះថ្នាក់ចរាចរណ៍កាលពីថ្ងៃទី២៤ ខែមករា ឆ្នាំ២០២៤ វេលាម៉ោង៧យប់ នៅលើផ្លូវខេត្តលេខ១២៣ គីឡូម៉ែត្រលេខ៧-៨ ស្ថិតនៅក្នុងភូមិពៃ ឃុំត្នោត ស្រុកបាទី ខេត្តតាកែវ រវាង រថយន្ត និង ម៉ូតូ២គ្រឿង ទិសដៅបញ្រ្ចាសគ្នាពីលិចទៅកើត បណ្ដាលអោយស្លាប់ម្នាក់ និងម្នាក់ទៀតរបួសធ្ងន់។

ករណីខាងលើនេះកម្លាំងជំនាញបានសហការជាមួយប៉ុស្តិ៍ដែលពាក់ព័ន្ធ បានរកឃើញរថយន្តបង្ក ដែលរត់គេចខ្លួនបាត់នោះឃើញហើយ នៅព្រឹកថ្ងៃទី២៥ ខែមករា ឆ្នាំ ២០២៤ នេះ ហើយបានដកហូតវត្ថុតាងមករក្សានៅអធិការដ្ឋាននគរបាលស្រុកបាទី ។ ចំណែកអ្នកបើកបរកម្លាំងជំនាញកំពុងធ្វើសាវតាជាតិដើម្បីអនុវត្តតាមនីតិវិធីបន្ត ៕ អែល វិចិត្រ