រាជធានីភ្នំពេញ ៖ បុរសម្នាក់ បានស្លាប់បាត់បង់ជីវិត ខណៈជិះម៉ូតូ ទៅបុកពីក្រោយរម៉កម៉ូតូ កំពុងឈប់ស្ងៀមពេញទំហឹង កាលពីវេលាម៉ោង ៧និង ១៥នាទីយប់ ថ្ងៃទី២៥ ខែមករា ឆ្នាំ២០២៤ នៅចំណុចលើផ្លូវជាតិលេខ ៣ ស្ថិតនៅភូមិ ទឹកថ្លា សង្កាត់ ក្រាំងពង្រ ខណ្ឌ ដង្កោ រាជធានីភ្នំពេញ ។

តាមរបាយការណ៍ពីសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាងម៉ូតូម៉ាក HONDA C125 ពណ៌ ខ្មៅ ពាក់ស្លាកលេខ តាកែវ 1B-0376 អ្នកបើកបរមានឈ្មោះ ប៊ិន រិទ្ធ ភេទប្រុស អាយុ៣៥ឆ្នាំ មុខរបរកម្មករសំណង់ មានទីលំនៅស្ថិតនៅក្នុងភូមិ ស្រែជំរៅ សង្កាត់ ចោមចៅ២ ខណ្ឌ ពោធិ៍សែនជ័យ រាជធានីភ្នំពេញ (បានស្លាប់បាត់បង់ជីវិតនៅកន្លែងកើតហេតុ ពាក់មួកសុវត្ថិភាព) បើកបរក្នុងទិសដៅពីត្បូងទៅជើង ចំណែករម៉កម៉ូតូម៉ាក HONDA C125 ពណ៌ខ្មៅ ពាក់ផ្លាកលេខ ភ្នំពេញ 1GA-5789 ឈប់ចតលើចញ្ចើមផ្លូវខាងស្តាំ ស្របពេលនោះ ម៉ូតូមកពីក្រោយ បុករម៉កម៉ូតូពីក្រោយពេញមួយទំហឹង បណ្ដាលអោយបោកដួលទៅលើដងផ្លូវ ស្លាប់យ៉ាងរន្ធត់ភ្លាមៗតែម្តង ។ ចំណែកអ្នកបើករម៉ក បានចេញបាត់ពីកន្លែងកើតហេតុ ។

ក្រោយកើតេហតុ សមត្ថកិច្ចជំនាញចរាចរណ៍ខណ្ឌដង្កោ បានធ្វើការវាស់វែង យកម៉ូតូនិងរម៉ក ទៅរក្សាទុកនៅអធិការដ្ឋាននគរបាលខណ្ឌដង្កោ ដើម្បីរង់ចាំដោះស្រាយបន្តតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ អែល វិចិត្រ