រាជធានីភ្នំពេញ ៖ បុរសម្នាក់បើករថយន្ត​ Hummer បុករថយន្ត​ Ford Raptor ត្រង់ផ្លូវបំបែកជាបួន បណ្ដាលឲ្យរងការខូចខាតយ៉ាងដំណំ ។ ​

ហេតុការណ៍នេះបានកើតឡើង កាលពីវេលាម៉ោង ​២យប់ត្រូវនិងថ្ងៃទី​២៦​ ខែមករា​ ឆ្នាំ​២០២៤ ស្ថិត​នៅចំណុច​គល់ស្ពាននាគកោះពេជ្រ​ សង្កាត់​ចតុមុខ​ ខណ្ឌ​ដូនពេញ រាជធានីភ្នំពេញ ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្ត​ Hummer ពាក់ស្លាកលេខ​ភ្នំពេញ​ 2AV-1389 ឡើងពីកំពង់ដរអរិយក្សត្រ ក្នុងទិសដៅពីជើងទៅត្បូង បានជ្រុលទៅបុករថយន្ត​ Ford Raptor ពាក់ស្លាកលេខ ភ្នំពេញ​ 2BE-0597 ចុះពីលើស្ពានភ្លោះកោះពេជ្រ បណ្ដាលរងការខូចខាត​យ៉ាងដំណំ ។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក​នៃស្នងការដ្ឋាននគរបាលរាជធានីភ្នំពេញ បានធ្វើការយករថយន្តទៅរក្សាទុក ដើម្បីរង់ចាំដោះស្រាយនៅពេលក្រោយ​ តាមច្បាប់បន្តទៀត ៕ Mrr Ka