ខេត្តពោធិ៍សាត់៖ តាមរបាយការណ៍ពីសមត្ថកិច្ច ដែលTVFB ទទួលបាន បានឲ្យដឹងថា មានករណីជនដៃដល់២នាក់ ជាខ្មាន់កាំភ្លើង បានចូលទៅបាញ់ជនរងគ្រោះមួយគ្រួសារ ដល់ក្នុងផ្ទះ បណ្តាលឲ្យរងរបួស ប្តី ប្រពន្ធ និងម្តាយ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។

ហេតុការណ៍នេះបានកើតឡើងកាលពីវេលាម៉ោង៧និង១០នាទីយប់ ថ្ងៃទី២ ខែកុម្ភៈ ឆ្នាំ២០២៤ ស្ថិតនៅភូមិបណ្តុះសណ្តែក សង្កាត់បន្ទាយដី ក្រុងពោធិ៍សាត់ ខេត្តពោធិ៍សាត់ ។

របាយការណ៍ពីសមត្ថកិច្ចបានបញ្ជាក់ថា ខ្មាន់កាំភ្លើងមានគ្នា២នាក់ មិនស្គាល់អត្តសញ្ញាណ បានជិះម៉ូតូមួយគ្រឿង មកឈប់មុខផ្ទះ រួចរុញទ្វារចូលក្នុងផ្ទះជនរងគ្រោះ ហើយបាញ់ចំនួន៦គ្រាប់ ខណៈជនរងគ្រោះកំពុងហូបបាយជួបជុំគ្រួសារ បណ្ដាលឲ្យរងរបួសមនុស្សចំនួន៣នាក់ មាន ប្តី ប្រពន្ធ និងម្តាយ ត្រូវបានបញ្ជូនទៅសង្គ្រោះនៅមន្ទីរពេទ្យ ខណៈជនរងគ្រោះ រកស៊ីលក់ត្រី។ ករណីនេះសមត្ថកិច្ចកំពុងតែធ្វើការស្រាវជ្រាវជាបន្ទាន់ ដើម្បីស្វែងរកចាប់ជនដៃដល់។

សូមបញ្ជាក់ថា ជនរងគ្រោះទាំង៣នាក់ រួមមាន៖

ទី១៖ ឈ្មោះ ទិត្យ កុសល្យ អាយុ៣៤ឆ្នាំ មុខរបបអាជីវករទិញត្រី។

ទី២៖ ប្រពន្ធឈ្មោះ ជា វួចហេង អាយុ៣៣ឆ្នាំ។

ទី៣៖ ឈ្មោះ ជា ណៃហួយ អាយុ៦១ឆ្នាំជាម្តាយ។

ជនរងគ្រោះទាំង៣នាក់ ត្រូវបានបញ្ជូនទៅមន្ទីពេទ្យបង្អែកសំពៅមាស ខណៈជនសង្ស័យជិះម៉ូតូគេចខ្លួនបាត់ ហើយបើតាមការវាយតម្លៃរបស់សមត្ថកិច្ច ករណីនេះបណ្តាលមកពីរឿងគំនុំ ៕ អែល វិចិត្រ