ខេត្តតាកែវ ៖ ករណីគ្រោះថ្នាក់ចរាចរណ៍មួយបានកើតឡើង ខណៈម៉ូតូកំពុងជិះឆ្លងខ្វះការប្រុងប្រយត្ន័ រថយន្តបើកលឿនផងនោះ បុកគ្នាពេញទំហឹង ស្លាប់បុរសវ័យចំណាស់ម្នាក់ យ៉ាងរន្ធត់ ។

ហេតុការណ៍នេះបានកើតឡើងកាលពីវេលាម៉ោង ៦ និង ០៥ នាទីថ្ងៃទី ៨ ខែ កុម្ភៈ ឆ្នាំ២០២៤ លើផ្លូវជាតិលេខ៣ ចន្លោះគីឡូម៉ែត្រលេខ ៤៩-៥០ ស្ថិតនៅក្នុងភូមិរូង ឃុំក្រាំងលាវ ស្រុកបាទី ខេត្តតាកែវ ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាង ម៉ូតូម៉ាកអាគុបជ្រុង ពណ៌ខៀវ គ្មានផ្លាកលេខ បើកបរពីកើតទៅលិច ដោយឈ្មោះ តូច ចាន់ ភេទប្រុស អាយុ៦៤ ឆ្នាំ មុខរបរ កសិករ (ពាក់មួកសុវត្ថិភាព) មានទីលំនៅភូមិ ស្វាយ ឃុំ ធ្លក ស្រុកទ្រាំង ខេត្តតាកែវ លុះដល់ចំណុចកើតហេតុ ម៉ូតូបានឆ្លងគន្លងផ្លូវ ខណៈនោះក៏មានរថយន្តម៉ាក ហ៊ីយ៉ាន់ដាយ ពណ៌ខៀវ ពាក់ផ្លាកលេខ ភ្នំពេញ 3E-5063 បើកមកពីទិសខាងជើងទៅត្បូង បើកក្នុងល្បឿនលឿន បុកពេញទំហឹង ស្លាប់អ្នកជិះម៉ូតូយ៉ាងរន្ធត់ ភ្លាមៗនោះអ្នកបើករថយន្តខាងលើ ប្រញាប់គេចខ្លួនបាត់ស្រមោល សល់តែរថយន្តតែប៉ុណ្ណោះ ។

ចំណែកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណីជាតិ ។ រីឯវត្ថុតាងម៉ូតូ និងរថយន្ត ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកបាទី ដើម្បីបំពេញបែបបទបន្តតាមនីតិវិធី ៕ អែល វិចិត្រ