រាជធានីភ្នំពេញ ៖ ជនសង្ស័យម្នាក់ ធ្វើសកម្មភាពលួចម៉ូតូម៉ាកស៊ុយសាគីនិច បានសម្រេច ជិះគេចខ្លួន ត្រូវបានសមត្ថកិច្ចខណ្ឌច្បារអំពៅ ឃាត់ខ្លួនបាន ។

ហេតុការណ៍នេះបានកើតឡើងកាលពីវេលាម៉ោង៧យប់ ថ្ងៃទី៨ ខែកុម្ភៈ ឆ្នាំ២០២៤នៅចំណុច មុខផ្ទះជួល ផ្លូវ លំ ភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ ។

សមត្ថកិច្ចបានឲ្យដឹងថា ជនរងគ្រោះឈ្មោះ យ៉ុង ម៉ូស ភេទ ប្រុស អាយុ ២៤ឆ្នាំ ជនជាតិ ខ្មែរ មុខរបរ ជាងដេគ័រ ស្នាក់នៅ ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ។

ចំណែកជនសង្ស័យឈ្មោះ សុខ វល័ក្ខ ភេទ ប្រុស អាយុ ២៩ឆ្នាំ ជនជាតិ ខ្មែរ មុខរបរ មិនពិតប្រាកដ ស្នាក់នៅ ភូមិកោះនរា សង្កាត់និរោធ ខណ្ឌច្បារអំពៅ។

មុនពេលកើតហេតុ ជនរងគ្រោះទុកម៉ូតូម៉ាក Suzuki Nex ពណ៌ផ្កាឈូកលាយស ផ្លាកលេខ ភ្នំពេញ ១CB-៨៦៨៤ នៅចំណុចកើតហេតុ ពុំបានចាក់សោកទេ រួចចូលលេងក្នុងផ្ទះ គូដណ្តឹង ស្រាប់តែជនសង្ស័យដើរមក ដល់យកដែកកែច្នៃចុងស្រួចកាច់សោម៉ូតូជនរងគ្រោះបញ្ឆេះជិះគេចខ្លួន។ លុះមកដល់ថ្ងៃទី ០៩ ខែកុម្ភៈ ឆ្នាំ២០២៤ ម៉ោង១០និង៣០នាទី សមត្ថកិច្ចឃាត់ខ្លួនបានជនសង្ស័យនៅភូមិព្រែក សង្កាត់ច្បារអំពៅ១ រួមនិងវត្ថុតាងម៉ូតូជនរងគ្រោះ, ដែកកែច្នៃចុងស្រួច២ និងកូនសោខ្សៀលេខ៨ ចំនួន១ បញ្ជូនមកទីស្នាក់ការប៉ុស្តិ៍និរោធ សាកសួរ។

បច្ចុប្បន្នជនសង្ស័យខាងលើត្រូវបានសមត្ថកិច្ចកសាងសំណុំរឿងចាត់ការតាមច្បាប់ ។