បុរសម្នាក់ស្រវឹងស្រា បើករថយន្ដបំបុកកម្លាំងនគរបាល ដែលកំពុងបំពេញការងារនៅគោលដៅត្រួតពិនិត្យជាតិស្រវឹង បណ្ដាលឲ្យខូចខាតសម្ភារៈនិងរត់ជាន់ជើងគ្នា.. អាងខ្សែស្រឡាយខ្នងធំ « ស.ក.ខ. »

ខេត្តកំពង់ស្ពឺ ៖ យោងតាមផេកស្នងការដ្ឋាននគរបាលខេត្តកំពង់ស្ពឺ បានឲ្យដឹងថា នាយប់ថ្ងៃទី៨ ខែកុម្ភៈ ឆ្នាំ២០២៤ កម្លាំងចម្រុះ អធិការដ្ឋាននគរបាលស្រុកបសេដ្ឋ នៃស្នងការដ្ឋាននគរបាលខេត្តកំពង់ស្ពឺ បានដាក់គោលដៅត្រួតពិនិត្យ អនុវត្តច្បាប់ស្តីពីចរាចរណ៍ផ្លូវគោក និងធ្វើតេស្តជាតិស្រវឹងពេលយប់លើផ្លូវក្រាលកៅស៊ូ នៅភូមិរកាកោង ឃុំកាត់ភ្លុក ស្រុកបសេដ្ឋ ខេត្តកំពង់ស្ពឺ ។

សមត្ថកិច្ចបានឲ្យដឹងថា ពេលកំពុងអនុវត្តន៍ស្រាប់តែមានរថយន្ត០១គ្រឿងម៉ាក FORD TERRITORY TITANIUM X ពណ៏ខ្មៅ សេរីឆ្នាំ២០២៣ លេខកម្ពុជា VANNAK99 បើកបរដោយឈ្មោះ ឃឹម វណ្ណៈ ភេទប្រុស អាយុ២៩ឆ្នាំ រស់នៅភូមិសាម៉រ ឃុំដើមឬស ស្រុកកណ្ដាលស្ទឹង ខេត្តកណ្ដាល បើកយ៉ាងលឿន មកដល់គោលដៅមិនបន្ថយល្បឿន រួចទៅបុកបង្គោលសាជីភ្លើងសញ្ញាបំពាក់សម្រាប់សម្គាល់គោលដៅសមត្ថកិច្ច អូសចំងាយប្រហែលជាង១០ម៉ែត្រ ។

បន្ទាប់ពីបុកហើយនោះ អ្នកបើកបររថយន្ដ បានចុះមកស្រែកឡូឡារករឿងសមត្ថកិច្ចនៅកន្លែងគោលដៅ ដោយមិនព្រមសហការជាមួយសមត្ថកិច្ចដើម្បីធ្វើការវាស់រកសាធាតុស្រវឹងដោយអះអាងថាមានបងធ្វេីការធំនៅខេត្តកំពង់ស្ពឺចាំអន្តរាគមន៍ លុះដល់ម៉ោង៩និង២០នាទីយប់ ទើបព្រមសហការដោយពិនិត្យឃើញសាធាតុស្រវឹង ជាក់ស្តែងលទ្ធផល០.៩៣mg/L ក្នុងមួយលីត្រខ្យល់ បញ្ជាក់ថាជាស្រវឹងខ្ពស់ល្មើសច្បាប់។

ដោយទាក់ទងសាច់ញាតិបងប្អូនមិនបាន (ខ្សែស្រឡាយខ្នងធំ) កម្លាំងបាននាំយករថយន្ដមកកាន់អធិការដ្ឋាននគរបាលស្រុកបសេដ្ឋ ចំណែកអ្នកបើកបរបានអោយចូលសំរាកនៅផ្ទះសំណាក់យីហោ "«សុខចាន់ធី » រីឯបទល្មើសដែលរកឃើញ សាធាតុស្រវឹង លទ្ធផល០.៩៣mg/L ក្នុងមួយលីត្រខ្យល់ ច្បាប់ពិន័យ ជាទឹកប្រាក់ ចំនួន ២,០០០,០០០ រៀល ( ពីលានរៀលគត់ ) ។

បច្ចុប្បន្នសមត្ថកិច្ចកំពុងបន្ដនីតិវិធីលើបទល្មើសបុគ្គលខាងលើ ប៉ុន្តែខ្សែស្រឡាយខ្នងក្រាស់ មិនទាន់ចេញមុខទេ ៕