រាជធានីភ្នំពេញ ៖ តារាចម្រៀងជើងចាស់ លោក ណូយ វ៉ាន់ណេត គឺជាសិល្បកររៀមច្បងមួយរូប ដែលទទួលបានការស្រលាញ់ចូលចិត្តពីបណ្តាមហាជនគ្រប់ស្រទាប់វណ្ណៈ ព្រោះថាទឹកដមសំឡេងផ្អែមពិរោះរបស់លោក បានបំពេរអារម្មណ៍ទស្សនិកជនឲ្យទោទន់ទៅនឹងសំនៀងដ៏ពិរោះរណ្តំចិត្តរបស់លោក មិនប្រែប្រួលឡើយ ។

តួយ៉ាងស្រាប់តែមានជនខិលខូច ចេតនាមិនល្អ បំពុលសង្គម បំភ្លើសបំភ្លៃការពិតទាំងស្រុង ដោយបានយករូបរបស់លោក មកសរសេរដាក់លើរូបរបស់លោកថា RIP និងបានសរសេរថា លោក ណូយ វ៉ាន់ណេត ទទួលមរណភាពទៅហើយ ដែលព័ត៌មានមិនពិតនេះ ធ្វើឲ្យមហាជនអ្នកគាំទ្រតារាចម្រៀងជើងចាស់រូបនេះ ភ្ញាក់ផ្អើលយ៉ាងខ្លាំង ។

តែទោះបីជាយ៉ាងណា ដើម្បីបញ្ជាក់ការពិតនោះ លោក ណូយ វ៉ាន់ណេត បានចេញមុខឡាយវីដេអូបញ្ជាក់ពីអ្នកដែលប្រមាថជីវិរបស់លោក និងបានសរសេរបញ្ជាក់នៅព្រឹកថ្ងៃទី១០ ខែកុម្ភៈ ឆ្នាំ២០២៤ នេះថា « ព័ត៌មានមិនពិត សូមប្អូន ម្ចាស់ផេកលុបចេញជាបន្ទាន់ បងបានចូលទៅមើលក្នុង Profile របស់ប្អូន Peter M Meng បានធ្វើការស៊ែរាល់វិដេអូដែលបាន Post នៅលើផេក Peter S Meng ​ប្រសិនប្អូនជាម្ចាស់ផេក Peter S Meng សូមធ្វើការលុបរូបរបស់បងជាបន្ទាន់។ សូមបងប្អូនជួយស៊ែព័ត៌មាននេះបន្ដផង ដើម្បីកុំអោយមានការយល់ច្រឡំទៀត។ខ្ញុំបាទ ណូយ វ៉ាន់ណេត

សូមអរគុណ! » ៕