រាជធានីភ្នំពេញ ៖ យុវជន០២នាក់បើកម៉ូតូក្នុងល្បឿនលឿន បានជ្រុលទៅបុកម៉ូតូមួយគ្រឿងទៀត បណ្តាលអោយបុរសចំណាស់ម្នាក់ រងរបួសធ្ងន់ ។

ហេតុការណ៍នេះបានកើតឡើងកាលពីវេលាម៉ោង ០៤ និង ២០នាទីល្ងាចថ្ងៃទី ១២ ខែកុម្ភៈ ឆ្នាំ២០២៤ នៅត្រង់ចំណុចផ្លូវលេខ ២១៣ កែងផ្លូវលេខ ១៨២ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។

តាមប្រភពព័ត៌មានពីប្រជាពលរដ្ឋបានអោយដឹងថា នៅមុនពេលកើតហេតុ គេបានឃើញបុរសចំណាស់ម្នាក់ បើកម៉ូតូមួយគ្រឿង ម៉ាក Wave ពណ៏ខ្មៅ ពាក់ស្លាកលេខ ភ្នំពេញ 1HC-9569 ធ្វើដំណើរក្នុងទិសដៅត្បូងទៅជើង ខណៈមកដល់ចំណុចកើតហេតុ ក៏ស្រាប់តែមានម៉ូតូមួយគ្រឿង ម៉ាក សង់ឌ្រីម ពណ៌ខ្មៅ ពាក់ស្លាកលេខ កំពត 1H-4685 បើកបរក្នុងល្បឿនលឿន ទិសដៅពីកើតទៅលិច បានជ្រុលទៅបុក ម៉ូតូបុរសចំណាស់ខាងលើពីចំហៀងពេញទំហឹង បណ្តាលអោយរងរបួសធ្ងន់បញ្ជូនទៅមន្ទីរពេទ្យភ្លាមៗ ។

ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅកាន់មន្រ្តីជំនាញចរាចរណ៍ ដើម្បីមកវាស់វែងយកម៉ូតូទាំង០២គ្រឿង យកទៅរក្សាទុកនូវ អធិការដ្ឋាននគរបាលខណ្ឌ៧មករា រង់ចាំដោះស្រាយពេលក្រោយ ៕ មេសា