រាជធានីភ្នំពេញ ៖ យោងតាមផេកផ្លូវការរបស់ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានឲ្យដឹងថា ក្រុមជនសង្ស័យចំនួន៧នាក់ ត្រូវបានកម្លាំងនាយកដ្ឋាននគរបាលព្រហ្មទណ្ឌ បង្ក្រាបបាន ពាក់ព័ន ករណីកាប់ប្លន់ជនជាតិបរទេស នៅខណ្ឌសែនសុខ។

សូមបញ្ជាក់ថា កាលថ្ងៃទី១០ ខែកុម្ភៈ ឆ្នាំ២០២៤ វេលាម៉ោង០៤និង០០នាទី មានករណីប្លន់ (ប្រើកាំបិតកាប់ទៅលើបុរសជនជាតិកូរ៉េ​ ឲ្យរងរបួសត្រង់ចំណុច​ថ្ពាល់ខាងឆ្វេង ដើម្បីប្លន់យកទ្រព្យសម្បត្តិ)​។

​ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងអគ្គស្នងការរងទទួលផែន និងឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ លុះដល់ថ្ងៃទី១២ ខែកុម្ភៈ ឆ្នាំ២០២៤ វេលាម៉ោង១៥៖៣០នាទី កម្លាំងរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាន បានដឹកនាំសហការជាមួយអធិការដ្ឋាននគរបាលខណ្ឌសែនសុខ បានឃាត់ខ្លួនជនសង្ស័យចំនួន៧នាក់ ដូចខាងក្រោម៖​

១.​ ឈ្មោះ ពេញ​ សុភណ្ឌ​ ភេទប្រុស​ អាយុ​១៦ឆ្នាំ​

២.​ ឈ្មោះ​ ណុប​ ដាវីត​ ភេទប្រុស​ អាយុ​១៥ឆ្នាំ

៣.​ ឈ្មោះ​ ផល​ សម្ភស់​ ភេទប្រុស​ អាយុ​១៥ឆ្នាំ​

៤.​ ឈ្មោះ​ សុខ​ ធា​សុភា​ ភេទប្រុស​ អាយុ​១៥ឆ្នាំ

៥.​ ឈ្មោះ​ ហាក់​ ម៉េងឈី​ ភេទប្រុស​ អាយុ​១៦ឆ្នាំ

៦.​ ឈ្មោះ​ សម្បត្តិ​ សន្យា​ ភេទប្រុស​ អាយុ​១៥ឆ្នាំ​

៧.​ ឈ្មោះ​ អាន​ ដេវីត​ ភេទប្រុស​ អាយុ​១៦ឆ្នាំ

ត្រង់ចំណុច ផ្លូវបេតុង​ ភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។

ក្រោយពីការសាកសួរជនសង្ស័យ​ទាំង​៧នាក់ សុទ្ធតែមានការពាក់ពន្ធនឹងអំពើកាប់ប្លន់ក្នុងរាជធានីភ្នំពេញកន្លងមក​។ ដោយឡែកក្នុងចំណោមជនសង្ស័យទាំង​៧នាក់​ មានជនសង្ស័យម្នាក់​ គឺបានចូលរួមប្រព្រឹត្តបទល្មើសកាប់ប្លន់ទៅលើជនជាតិកូរ៉េ​ កាលពីថ្ងៃទី១០​ ខែកុម្ភ:​ ឆ្នាំ២០២៤​ រួមទាំងបក្ខពួកផ្សេងទៀត​។

បច្ចុប្បន្ននាយកដ្ឋានបានប្រគល់ឲ្យទៅអធិការដ្ឋាននគរបាលខណ្ឌសែនសុខ​ ដើម្បីចាត់ការតាមនីតិវិធីបន្ត៕