រាជធានីភ្នំពេញ ៖ យុវជនម្នាក់បើកម៉ូតូជ្រុលទៅបុក ម៉ូតូមួយគ្រឿងទៀត បណ្តាលអោយដាច់កង់មុខ និងរងរបួសធ្ងន់ស្រាល០២នាក់ ត្រូវបានបញ្ជូនទៅមន្ទីរពេទ្យ។

ហេតុការណ៍នេះបានកើតឡើងនៅវេលាម៉ោង ១០និង៣០នាទីព្រឹកថ្ងៃទី២០ ខែកុម្ភៈ ឆ្នាំ២០២៤ ដោយតាមបណ្តោយផ្លូវ ២០០៤ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។

បើតាមប្រភពព័ត៌មានពីពលរដ្ឋបានអោយដឹងថា មុនពេលកើតហេតុ គេបានឃើញបុរសម្នាក់ជិះម៉ូតូ ហុងដាឌ្រីម ពណ៌ខ្មៅ ពាក់ស្លាកលេខ 1D-7782 បើកបរតាមបណ្តោយផ្លូវ ២០០៤ ខណៈមកដល់ចំណុចកើតហេតុ បុរសខាងលើដោយឃើញផ្លូវមានសភាពស្ងាត់ក៏បានបត់ ត្រឡប់ក្រោយ ។ ភ្លាមៗ ក៏ស្រាប់តែមានម៉ូតូមួយគ្រឿង ម៉ាក PCX ពណ៌ស ពាក់ស្លាកលេខ ភ្នំពេញ 1FI- 8275 បើកដោយយុវជនម្នាក់ក្នុងល្បឿនលឿន បានជ្រុលទៅបុក ម៉ូតូសង់ឌ្រីម ចំកង់ខាងមុខពេញទំហឹង បណ្តាលអោយដាច់កង់ និងបង្កបុរសជាអ្នកបើកម៉ូតូសង់ឌ្រីម របួសស្រាល ។ ចំណែកម៉ូតូPCX មិនទាន់អស់ល្បឿន ក៏ជ្រុលទៅមុខអូសប្រមាណជាង ១០ម៉ែត្រ បណ្តាលអោយយុវជនខាងលើ រងរបួសធ្ងន់បញ្ជូនទៅសង្គ្រោះភ្លាមៗ តែម្តង។

ក្រោយពេលកើតហេតុ សមត្ថកិច្ចមូលដ្ឋានបានមកធ្វើការវាស់វែងយកម៉ូតូទាំង០២គ្រឿង យកទៅរក្សាទុកនៅអធិការដ្ឋាននគរបាលខណ្ឌសែនសុខ រងចាំដោះស្រាយពេលក្រោយ ៕ អែល វិចិត្រ +មេសា