ខេត្តព្រះសីហនុ ៖ យោងតាមផេកផ្លូវការរបស់ ឯកឧត្តម គួច ចំរើន អភិបាលខេត្តព្រះសីហនុ បានឲ្យដឹងថា « ម្សិលមិញ​ សម្ដីធំៗ​ បើកឡានរត់គេច​ លឿនខ្លាំងណាស់​ តែថ្ងៃនេះ​ បានវាស់កំពស់​ ហើយស្រេច» ។

សូមបញ្ជាក់ថា យោងតាមផេកស្នងការដ្ឋាននគរបាលខេត្តព្រះសីហនុ បានឲ្យដឹងថា នៅថ្ងៃទី២២ ខែកុម្ភៈ​ ឆ្នាំ២០២៤​ វេលាម៉ោង ០៩និង៥០នាទី លើផ្លូវមិត្តភាព​ ត្រង់ចំណុចជិតភ្នំ៩៦ ស្ថិតក្នុង​ភូមិ៥ សង្កាត់លេខ៤ ក្រុង-ខេត្តព្រះសីហនុ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្ត ០១គ្រឿង​ ម៉ាក​ LEXUS GS300 ពណ៌ខ្មៅ​ ពាក់ផ្លាកលេខ​ ខេមរភូមិន្ទ ​02 2-4572 បើកបរដោយឈ្មោះ​ FANG LAJIAN ភេទប្រុស អាយុ៤៧ឆ្នាំ ជនជាតិចិន កាន់លិខិតឆ្លងដែន​លេខ​ EJ4916179 មានបណ្ណបើកបរខ្មែរលេខ B.00355078​ បច្ចុប្បន្នស្នាក់នៅ​ភូមិ៤​ សង្កាត់លេខ៤​ ក្រុង-ខេត្តព្រះសីហនុ​ ដែលមានទិសដៅពី​ លិច ទៅ​ កើត លុះមកដល់ចំណុចកើតហេតុ​ រថយន្តខាងលើ​បើកៗបានឈប់ដោយមិនបានផ្តល់សញ្ញា​ ក៏ត្រូវបានរថយន្ត០១គ្រឿង ម៉ា​ក​​ HYUNDAI STAREX ពណ៌ស​ ពាក់ផ្លាកលេខ​ ព្រះសីហនុ​2B-0276 បើកបរដោយឈ្មោះ​ អ៊ន់​ ប៉ូលីន​ ភេទប្រុស​ អាយុ​៤៣ឆ្នាំ​ មុខរបរ​បើកបររថយន្ត​ បច្ចុប្បន្នស្នាក់នៅ​ភូមិ​៥​ សង្កាត់​លេខ​៤​ ក្រុង​-ខេត្តព្រះសីហនុ ដែលបើកបរក្នុងទិសដៅស្របគ្នាបានបុកពីខាងក្រោយ ។

ករណីគ្រោះថ្នាក់ចរាចរណ៍ខាងលើនេះ​ បណ្តាលឱ្យរថយន្ត​ ០២គ្រឿង​ខូចខាតស្រាល​ និងមិនបណ្តាលឱ្យរងរបួសដល់មនុស្សឡើយ​ ។

ក្រោយពេលកើតហេតុ​ រថយន្តទាំងពីរ​ បានបើកមកឈប់ក្បែរចិញ្ចើមផ្លូវ​ និងបានចរចារគ្នា​ ដោយមិនមានការព្រមព្រៀង​ ស្រាប់តែអ្នកបើកបររថយន្ត​ម៉ាក​ LEXUS GS300 បានបើករថយន្តចាកចេញពីកន្លែងកើតហេតុ​ ។

បន្ទាប់មកសមត្ថកិច្ច​ បានស្រាវជ្រាវរកឃើញរថយន្តខាងលើ យកមកចតទុកចោលនៅក្នុងរបងសាលាខេត្តចាស់​ ។ រីឯវត្ថុតាង​ រថយន្ត​ ទាំង០២គ្រឿង​​​ សមត្ថកិច្ចបានយកមករក្សាទុកនៅការិយាល័យនគរបាលចរាចរណ៍ផ្លូវគោក​ និងកំពុងបន្តស្វែករកអ្នកបើកបរខាងលើ​ មកដោះស្រាយតាមនីតិវិធី​ ៕