រាជធានីភ្នំពេញ ៖ យោងតាមផេកផ្លូវការរបស់ រដ្ឋបាលសាលារាជធានីភ្នំពេញ បានឲ្យដឹងថា ដោយអនុវត្តតាមការចង្អុលបង្ហាញពីសម្ដេចមហាបវរធិបតី​ ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា​ លើការយកចិត្តទុកដាក់សុខមាលភាពប្រជាពលរដ្ឋ និងដោយយោងទៅលើស្ថានភាពជាក់ស្ដែងនៃការរីករាលដាលជំងឺគ្រុនឈាមមានការកើនឡើង ។

រដ្ឋបាល​រាជធានី​ដឹកនាំ​ដោយ​ឯកឧត្ដម​ ឃួង ស្រេង​ អភិបាល​ នៃគណៈអភិបាលរាជធានីភ្នំពេញ បានបើកកិច្ចប្រជុំជាមួយអាជ្ញាធរនិងមន្ត្រីជំនាញពាក់ព័ន្ធ ដើម្បីចាត់វិធានការជាបន្ទាន់ ដោយចាត់​ឱ្យក្រុមការងារនៃមន្ទីរសុខាភិបាលរាជធានីភ្នំពេញ​ និងមានកិច្ចសហការពីកងពលតូចលេខ៧០ ចុះបាញ់ថ្នាំ​សម្លាប់​មូសនៅតាម​មូលដ្ឋាន​សង្កាត់ទាំង១០៥ ក្នុងរាជធានីភ្នំពេញសំដៅធ្វើយ៉ាងណា លុបបំបាត់ឱ្យអស់មូសខ្លា និងគ្មានជម្ងឺគ្រុនឈាម ៕