រាជធានីភ្នំពេញ ៖ នារីម្នាក់បើករថយន្ត ព្រូស បុករថយន្ត ព្រូស២គ្រឿងទៀត តកន្ទុយគ្នា បណ្ដាលអោយរងការខូចខាត នៅតាមបណ្ដោយផ្លូវព្រះមុនីវង្ស កែងផ្លូវ២១៤ ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ វេលាម៉ោង១០យប់ ថ្ងៃទី២៨ ខែកុម្ភៈ ឆ្នាំ២០២៤។
តាមប្រភពព័ត៌មានពីបងប្អូនប្រជាពលរដ្ឋ និងពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ គេបានឃើញនារីម្នាក់បើករថយន្ត ព្រូស ពាក់ស្លាកលេខ ភ្នំពេញ 2BU-7814 បើកតាមបណ្ដោយផ្លូវព្រះមុនីវង្ស ក្នុងទិសដៅពីត្បូងទៅជើង មកដល់ស្ដុបបំបែកជាបួន ចំពេលរថយន្ដព្រូស២គ្រឿងទៀតកំពុងឈប់ស្ដុប ក៏បើកមកបុករថយន្ត ព្រូស ពាក់ស្លាកលេខភ្នំពេញ 2BC-2847 ហើយបន្តទៅបុករថយន្ត ព្រូស ពាក់ស្លាកលេខ ភ្នំពេញ 2AK-7828 បណ្ដាលអោយរថយន្ដបុកតកន្ទុយគ្នាចំនួន៣គ្រឿង រងការខូចខាតយ៉ាងដំណំ។
ក្រោយកើតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ធ្វើការវាស់វែងយករថយន្ត ទៅរក្សាទុក ដើម្បីរង់ចាំដោះស្រាយនៅពេលក្រោយ តាមច្បាប់បន្តទៀត ៕ Mrr Ka
