រាជធានីភ្នំពេញ ៖ យុវជនម្នាក់ ជិះម៉ូតូឌុបគ្នាក្នុងល្បឿនលឿន មិនប្រយ័ត្ន ក៏បុកកង់បីឥណ្ឌាពីក្រោយ បណ្ដាលឲ្យកង់បីឥណ្ឌា រេចង្កូតក្រឡាប់លើរថយន្ដ Prius ដែលចតចោល បណ្ដាលឲ្យមានមនុស្សរបួសធ្ងន់ និង ស្រាល៣នាក់។
ហេតុការណ៍នេះ បានកើតឡើងនៅតាមបណ្ដោយផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ នាវេលាម៉ោង២យប់ ត្រូវនឹងថ្ងៃទី០១ ខែមិនា ឆ្នាំ២០២៤។
តាមប្រភពព័ត៌មានពីបងប្អូនប្រជាពលរដ្ឋ និងពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ គេបានឃើញយុវជន២នាក់ ជិះម៉ូតូ HONDA Dream ពាក់ស្លាកលេខ ភ្នំពេញ 1KN-2290 ជិះតាមបណ្ដោយផ្លូវ១៩៨៦ ក្នុងទិសដៅពីកើតមកលិច លុះដល់ចំណុចកើតហេតុ ក៏បើកបុកកង់បីឥណ្ឌា ពាក់ស្លាកលេខ បាត់ដំបង1AO-1703 ពីក្រោយពេញមួយទំហឹង បណ្ដាលឲ្យកង់បីឥណ្ឌា រេចង្កូតក្រឡាប់លើរថយន្ដ Prius ដែលចតចោល បណ្តាលឲ្យមានមនុស្សរបួសធ្ងន់ និង ស្រាល៣នាក់ ។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក នៃអធិការដ្ឋាននគរបាលខណ្ឌសែនសុខ បានចុះមកធ្វើការវាស់វែងយកម៉ូតូ កង់បីឥណ្ឌា និងរថយន្ដ ទៅរក្សាទុករង់ចាំការដោះស្រាយនៅពេលក្រោយ តាមច្បាប់បន្តទៀត ៕ Mrr Ka
