រាជធានីភ្នំពេញ ៖ នារីស្រស់ស្អាតម្នាក់ បើករថយន្តស៊េរីទំនើបម៉ាកKIA បុករបាំងថ្មក្រឡាប់ជាច្រើនជុំ ។ ចំណែករថយន្តវិញ ខ្ទេចស្ទើរទាំងស្រុង រីឯអ្នកបើកបរ រងរបួសត្រូវបានបញ្ជូនសង្គ្រោះបន្ទាន់នៅមន្ទីរពេទ្យ ។

ហេតុការណ៍នេះកើតឡើង នៅតាមផ្លូវបេតុងកោះនរា សង្កាត់និរោធ ខណ្ឌច្បាអំពៅ រាជធានីភ្នំពេញ វេលាម៉ោង១០យប់ ថ្ងៃទី២៩ ខែកុម្ភៈ ឆ្នាំ២០២៤ ។

តាមប្រភពព័ត៌មាន ពីបងប្អូនប្រជាពលរដ្ឋ និងពីសមត្ថកិច្ចមូលដ្ឋាន បានឲ្យដឹងថា មុនពេលកើតហេតុ គេបានឃើញនារីម្នាក់ បើករថយន្ត​ KIA ពាក់ស្លាកលេខ ភ្នំពេញ​ 2BN-5679 បើកតាមបណ្ដោយផ្លូវ បេតុងកោះនរា ក្នុងទិសដៅពីកើតមកលិច មកដក់កន្លែងកើតហេតុ ក៏បើកទៅបុករបាំងថ្មចែកទ្រូងផ្លូវ ​ក្រឡាប់ជាច្រើនជុំ ​បណ្ដាលរងការខូចខាតតែម្តង​។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក​ នៃអធិការដ្ឋាន​នគរបាល​ខណ្ឌច្បារអំពៅ​ បានចុះមកធ្វើការវាស់វែង យករថយន្តទៅរក្សាទុក ដើម្បីរង់ចាំដោះស្រាយនៅពេលក្រោយ តាមច្បាប់បន្តទៀត ៕ Mrr Ka