រាជធានីភ្នំពេញ ៖ បុរសម្នាក់ រៀបបើកទ្វារចុះពីលើរថយន្ត ត្រូវបានជនសង្ស័យម្នាក់លូកដៃឆក់ទូរសព្ទដៃ iphone 13 pro max បានសម្រេច នៅម្ដុំសូរិយាម៉ល.

ហេតុការណ៍នេះកើតឡើងនៅតាមបណ្ដោយផ្លូវ៥១ ស្ថិតនៅក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ វេលាម៉ោង០៣ទៀបភ្លឺ ត្រូវនឹងថ្ងៃទី៩ ខែមីនា ឆ្នាំ២០២៤ ។

តាមប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុ គាត់គ្រាន់បានបើករថយន្ត មកឈប់ចាំប្អូនស្រី រួចក៏លើកទូរសព្ទដៃតេ មិនទាន់បានបើកទ្វារចុះពីលើរថយន្តផង ក៏លេចមុខជនសង្ស័យម្នាក់ បានរត់សំដៅមកគាត់ ហើយលូកដៃឆក់យកទូរសព្ទដៃ iphone 13 pro max ពីដៃបានសម្រេច រួចរត់គេចខ្លួនចូលទៅក្នុងដឿងហែម។

ក្រោយពេលកើតហេតុ កម្លាំងសមត្ថកិច្ចកងរាជអាវុធហត្ថខណ្ឌដូនពេញ ក៏បានមកដល់ បាននាំយកជនរងគ្រោះទៅដាក់ពាក្យបណ្ដឹង ដើម្បីតាមចាប់ជនសង្ស័យខាងលើ យកមកដាក់ទោសទៅតាមផ្លូវច្បាប់ ៕ Mrr Ka