រាជធានីភ្នំពេញ ៖ រថយន្តធុនធំមួយគ្រឿង ដាច់ហ្រ្វាំង ជ្រុលទៅបុកម៉ូតូ០១គ្រឿង បន្តទៅកៀររថយន្តក្រុង រួចទៅបុករថយន្តដឹកដែក និងបុកគូទរថយន្តមួយគ្រឿងទៀត រងការខូចខាតយ៉ាងដំណំ ។

ហេតុការណ៍នេះកើតឡើងកាលពីវេលាម៉ោង ១២ និង ១៥នាទីថ្ងៃត្រង់ទី១១ ខែមីនា ឆ្នាំ២០២៤នេះ ចំណុចស្តុបឡឥដ្ឋ តាមបណ្តោយមហាវិថីឈ្នះឈ្នះ ស្ថិតក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ។

តាមប្រភពព័ត៌មានបានប្រាប់អោយដឹងថា នៅមុនពេលកើតហេតុ គេឃើញមានរថយន្តធុនធំមួយគ្រឿង ពាក់ស្លាកលេខ កំពង់ឆ្នាំង 4A-0011 បើកបរតាមបណ្តោយមហាវិថីឈ្នះឈ្នះ ក្នុងល្បឿនលឿន ខណៈមកជិតដល់ស្តុបឡឥដ្ឋ រថយន្តបានដាច់ហ្រ្វាំង ជ្រុលទៅបុកម៉ូតូពីក្រោយពេញទំហឹង បណ្តាលអោយស្រ្តីម្នាក់ រងរបួសធ្ងន់បញ្ជូនទៅមន្ទីរពេទ្យដើម្បីសង្គ្រោះបន្ទាន់ ហើយរថយន្តមិនទាន់អស់ល្បឿន ក៏បួងចង្កូតទៅកៀររថយន្តក្រុងដែលធ្វើដំណើរស្របទិសគ្នា និងបានបន្តទៅបុករថយន្តកូរ៉េដឹកដែកពីក្រោយពេញទំហឹង រួចក៏រុញរថយន្តដឹកដែក ទៅបុករថយន្តកាម៉ារីឆ្លាមមួយគ្រឿងពេញទំហឹង ។

ក្រោយកើតហេតុ សមត្ថកិច្ចមូលដ្ឋានចុះមកដល់រួចបន្តទាក់ទង ទៅមន្រ្តីជំនាញចរាចរណ៍នៃស្នងការដ្ឋាននគរបាលរាជធានីភ្នំពេញ វាស់វែងយករក្សាទុករងចាំដោះស្រាយពេលក្រោយតាមច្បាប់ ៕ មេសា