រាជធានីភ្នំពេញ ៖ រថយន្តឡិចស៊ីសមួយគ្រឿង បើកបុករថយន្តដឹកអ្នកដំណើរ ក្រឡាប់ផ្ងារជើង ផ្អើលសមត្ថកិច្ចជួយអន្តរាគមន៍ ។
គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង ១២ និង ៥៣នាទីថ្ងៃត្រង់ ត្រូវនិងថ្ងៃទី ១៥ ខែមីនា ឆ្នាំ២០២៤ តាមបណ្តោយផ្លូវបេតុង ៣០ម៉ែត្រថ្មី ស្ថិតក្នុងសង្កាត់ក្រាំងធ្នុង ខណ្ឌសែនសុខ រាជធានីភ្នំពេញ ។
តាមប្រភពព័ត៌មានបានអោយដឹងថា គេឃើញមានរថយន្តមួយគ្រឿង ម៉ាក ឡិចស៊ីស RX300 ពណ៌កាំម៉ៃ ពាក់ស្លាកលេខ ភ្នំពេញ 2AI-9710 បើកក្នុងទិសដៅពីជើងទៅត្បូង លុះមកដល់ផ្លូវបំបែកជាបួន ក៏ស្រាប់តែមានរថយន្តដឹកអ្នកដំណើរឯកជនមួយគ្រឿង ម៉ាក ហ៊ីយ៉ាន់ដាយ ពណ៌ ទឹកដោះគោ ពាក់ស្លាកលេខ ភ្នំពេញ 3F-8331 បើកបរទិសដៅពីលិចទៅកើត ខណៈនោះរថយន្តឡិចស៊ីស បានបុករថយន្តក្រុងពេញទំហឹង បណ្តាលអោយក្រឡាប់ផ្ងារជើង ។ ចំណែករថយន្ត ខូចខាតផ្នែកខាងមុខស្ទើរទាំងស្រុង តែសំណាងល្អមិនមាននរណារងរបួសឡើយ ។
ក្រោយពេលកើតហេតុ សមត្ថកិច្ចមូលដ្ឋានចុះមកដល់រួចធ្វើការវាស់វែងយករថយន្តទាំង០២គ្រឿង ទៅរក្សាទុកនៅការិយាល័យចរាចរណ៏ក្រុង រងចាំដោះស្រាយគ្នាពេលក្រោយ ៕ មេសា
