រាជធានីភ្នំពេញ ៖ រថយន្តម៉ាក LexusLX470 មួយគ្រឿង បានជួបគ្រោះថ្នាក់ចរាចរណ៍ រេចង្កូតបុកបង្គោលស្លាកសញ្ញាស្ពានកោះនរា បាក់មួយដើម ហោះធ្លាក់ពីលើស្ពានផ្ទប់ជញ្ជាំងក្រោមស្ពាន បណ្តាលឲ្យមនុស្សចំនួន ០៦នាក់ របួសធ្ងន់ស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។

ហេតុការណ៍នេះបានកើតឡើង កាលពីវេលាម៉ោង៦ព្រឹក ថ្ងៃទី១៧ ខែមីនា ឆ្នាំ២០២៤ ចំណុចគល់ស្ពានកោះនរាខាងកើត សង្កាត់និរោធ ខណ្ឌច្បារអំពៅ រាជធានីភ្នំពេញ។

តាមប្រភពព័ត៍មាន ពីសមត្ថកិច្ច​បានឲ្យដឹងថា មុនពេលកើតហេតុ ប្រជាពលរដ្ឋ បានគេឃើញរថយន្តម៉ាក Lexus LX៤៧០ ពណ៌ទឹកប៊ិច ពាក់ផ្លាកលេខ ភ្នំពេញ 2M-5906 ជិះគ្នា០៦នាក់ក្នុងរថយន្ត បានក្រោកតាំងពីងងឹតចេញពីខេត្តស្វាយរៀង ឆ្ពោះមករាជធានីភ្នំពេញ ក្នុងទិសដៅពីកើតមកលិចក្នុងល្បឿនលឿន លុះបើកមកដល់ក្នុងបរិវេណកោះនរា ក៏បានរេចង្កូតឡើងលើឃឿនថ្មស្ពានកោះនរានោះ ហើយបុកបង្គោលផ្លាកសញ្ញាកំណត់ល្បឿន៤០គីឡូម៉ែត្រក្នុងមួយម៉ោង បាក់អស់០១ដើម ហោះធ្លាក់ពីលើស្ពាន ផ្ទប់នឹងរបាំងថ្មស្ពានច្រាំងទន្លេ គាបជាប់ទៅមុខលែងរួច ។

ដោយឡែកមនុស្សទាំង ០៦នាក់ដែលជិះក្នុងរថយន្តនេះ រងរបួសធ្ងន់ស្រាល ត្រូវបានបញ្ចូនទៅសង្គ្រោះបន្ទាន់នៅមន្ទីរពេទ្យ ។

ចំណែករថយន្តខាងលើ ត្រូវបានសមត្ថកិច្ចខណ្ឌច្បារអំពៅ ស្ទូចយករថយន្តខាងលើយកទៅរក្សាទុក ដើម្បីដោះស្រាយគ្នានៅពេលក្រោយបន្ត៕ អែល វិចិត្រ