រាជធានីភ្នំពេញ  ៖ យោងតាមផេកផ្លូវការរបស់ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ បានឲ្យដឹងថា ក្រុមក្មេងទំនើងរហ័សនាម RSK ដែលដេញកាប់ចាក់គ្នាយ៉ាងអណាធិបតេយ្យ នៅខណ្ឌបឹងកេងកង ត្រូវកម្លាំងនាយកដ្ឋាននគរបាលព្រហ្មទណ្ឌ ស្រាវជ្រាវបង្ក្រាបបានជនដៃដល់៤នាក់ បញ្ជូនទៅតុលាការ។

ប្រតិបត្តិការនេះធ្វើឡើងដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉ែង ជួ ប្រធាននាយកដ្ឋាននគរបាលព្រហ្មទណ្ឌ និងលោកឧត្តមសេនីយ៍ត្រី វុទ្ធី វង្សវិបុល អនុប្រធាននាយកដ្ឋាន ព្រមទាំងដឹកនាំប្រតិបត្តិការដោយលោកវរសេនីយ៍ឯក ឡេង ប៊ុនហួរ នាយការិយាល័យព្រហ្មទណ្ឌកម្រិតស្រាល និងលោកវរសេនីយ៍ទោ ឃុត ជីវុឌ្ឍ នាយរងការិយាល័យ។

នៅថ្ងៃទី១២ ខែមីនា ឆ្នាំ២០២៤​ ត្រង់ចំណុចមុខវត្តលង្កា មហាវិថីព្រះសីហនុ២៧៤ សង្កាត់បឹងកេងកងទី១ ខណ្ឌបឹងកេងកង​ រាជធានីភ្នំពេញ​ កម្លាំងជំនាញការិយាល័យព្រហ្មទណ្ឌកម្រិតស្រាល​ និងមានការចូលរួមពីអធិការដ្ឋាននគរបាលខណ្ឌបឹងកេងកង បានឃាត់ខ្លួនជនសង្ស័យចំនួន០៤នាក់៖

*ទី​១៖ ឈ្មោះ សាខន បញ្ញា ភេទប្រុស អាយុ១៨ឆ្នាំ

*ទី២៖ ឈ្មោះ​ ឌឿ​ តុលា​ ភេទប្រុស​ អាយុ១៧ឆ្នាំ​

*ទី៣៖ ឈ្មោះ​ ស៊ុត រ៉ានុត ភេទប្រុស អាយុ១៨ឆ្នាំ

*ទី៤៖ ឈ្មោះ​ ឡី លឿន ភេទប្រុស អាយុ៣០ឆ្នាំ។

ក្នុងនោះ សម្ភារៈ និងវត្ថុតាងដកហូតរួមមាន​៖

១៖ ម៉ូតូម៉ាក SUZUKI Nex2 ពណ៌ស ពាក់ស្លាកលេខ ភ្នំពេញ 1KJ-9311

២៖ ម៉ូតូម៉ាក​ HONDA PCX ពណ៌ស​ ពាក់ស្លាកលេខ​ ភ្នំពេញ​ 1HI-7975

៣៖ ទូរស័ព្ទដៃចំនួន ៤គ្រឿង

៤៖ ដាវវែង​ ចំនួន០៣ដើម​

៥៖ កាំបិត​ផ្គាក់​ ចំនួន​០២ដើម

៦៖ កាំបិតបុ័ងតោ​ ចំនួន០២ដើម

៧៖ កាំបិតចិតបន្លែ​ ចំនួន០១ដើម

៨៖ សោ មួយចំនួន

៩៖ សោម៉ូតូ​ ចំនួន០២គ្រាប់

១០៖ ដុំថ្ម​ មួយចំនួន

១១៖ ស្លាកលេខម៉ូតូ​ ០២សន្លឹក​ (កណ្ដាល​ 1R-1273) (កណ្ដាល​ 1N-3746)

១២៖ សំបកគ្រាប់កាំភ្លើង​ ចំនួន០១គ្រាប់។

បច្ចុប្បន្ន​ជនសង្ស័យកំពុងសាកសួរ​ និងកសាង​សំណុំរឿង​ចាត់ការបន្តតាមនីតិវិធី​៕