រាជធានីភ្នំពេញ ៖ បុរសជនជាតិបរទេសម្នាក់ ត្រូវបានរថយន្តមិនស្គាល់ម៉ាក២គ្រឿង បុកផ្ដាច់ជីវិតភ្លាមៗ នៅត្រង់ចំណុចកើតហេតុ។

ហេតុការណ៍នេះកើតឡើងនៅតាមបណ្ដោយផ្លូវព្រះស៊ីសុវត្ថិ ស្ថិតនៅក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ វេលាម៉ោង២យប់ ឈានចូលថ្ងៃទី១៨ ខែមីនា ឆ្នាំ ២០២៤ ។

តាមប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុ គេតែងតែឃើញបុរសជនជាតិបរទេសម្នាក់ ដើរទៅដើរមកតាមបណ្ដោយផ្លូវព្រះស៊ីសុវត្ថិខាងលើនេះ ស្រាប់តែថ្ងៃកើតហេតុ មិនដឹងថាបុរសជនជាតិខាងលើដើរឆ្លងផ្លូវ ឬយ៉ាងម៉េចនោះទេ ក៏ត្រូវបានរថយន្តចំនួន ០២គ្រឿង ជិះក្នុងល្បឿនលឿន មិនចាំម៉ាកនិងស្លាកលេខ បានបុកពេញមួយទំហឹង ផ្ដាច់ជីវិតបុរសជនជាតិបរទេសខាងលើបណ្ដាលឲ្យស្លាប់ភ្លាមៗ នៅត្រង់ចំណុចកើតហេតុ ។

ក្រោយពីកើតហេតុ សមត្ថកិច្ចក៏បានមកដល់បានទាក់ទងទៅខាងជំនាញចរាចរណ៍នៃអធិការនគរបាលខណ្ឌដូនពេញ ធ្វើកោសល្យវិច័យនិងយកសាកសព ជនជាតិបរទេសខាងលើនោះ ទៅតម្កល់ទុកនៅវត្ត រង់ចាំសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើតវិញ។ ចំណែករថយន្ដសមត្ថកិច្ចនឹងធ្វើការស្រាវជ្រាវរករថយន្តយកមកដោះស្រាយគ្នាទៅតាមនីតិជាច្បាប់ ៕ Mrr Ka