រាជធានីភ្នំពេញ ៖ សមត្ថកិច្ចបានប៉ុស្តិ៍រដ្ឋបាលសង្កាត់ផ្សារដើមថ្កូវ ធ្វើការចាប់ឃាត់ខ្លួនបានជនសង្ស័យចំនួន០២នាក់ ពាក់ព័ន្ធនិងករណីប្រើប្រាស់និងរក្សាទុកនៅសារធាតុញៀនខុសច្បាប់ និងដកហូតបានក្រាមសថ្លា និង៤៣កញ្ចប់ថង់តូចល្មម កាលពីវេលាម៉ោង៥ ទៀបភ្លឺឈានចូល ថ្ងៃទី៨ ខែ សីហា ឆ្នាំ ២០២១ នៅចំណុចតាមផ្លូវព្រះមុនីវង្ស ក្រុម៣២ ភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទី១ឈ្មោះ ហូ ចិន្តា ហៅ ថុំ ភេទស្រី អាយុ ២៨ឆ្នាំ មុខរបរមិនពិតប្រាកដ និងជនសង្ស័យទី២ឈ្មោះ យ៉េន សុខេន ហៅ ចាន់ ធី ភេទស្រី អាយុ ៥៧ឆ្នាំ មុខរបរ បោកខោអាវ ។ ទាំង២នាក់ស្នាក់នៅផ្ទះជួលគ្មានលេខ ផ្លូវលំ ក្រុម៣២ ភូមិ៥ សង្កាត់ផ្សារដើមថ្កូវ ខណ្ឌចំការមន ។

សមត្ថកិច្ចបានឲ្យដឹងថា មុននឹងឈានដល់ការចាប់ឃាត់ខ្លួនបានជនសង្ស័យខាងលើ កម្លាំងសមត្ថកិច្ចប៉ុស្តិ៍បានធ្វើការដើរល្បាតក្នុងភូមិសាស្រ្តជាពិសេស តំបន់ស្មុគស្មាញ លុះមកដល់ចំណុចកើតហេតុប្រទះឃើញស្រ្តី២នាក់មានការសង្ស័យ ព្រោះម៉ោងទៀបភ្លឺហើយមិនដេកពួន ហើយអង្គុយក្បែរគ្នា នៅមុខផ្ទះ ក៏ធ្វើការឆែកឆេររកឃើញក្រាមសថ្លា សង្ស័យជាគ្រឿងញៀនសរុបចំនួន ៤៣កញ្ចប់ថត់តូច ទើបសមត្ថកិច្ចធ្វើការឃាត់ខ្លួននាំមកប៉ុស្តិ៍ផ្សារដើមថ្កូវដើម្បីធ្វើការសាកសួរបន្តទៀត និងបញ្ជូនខ្លួនទៅកាន់អធិការដ្ឋានខណ្ឌចំការមន ដើម្បីចាត់ការតាមច្បាប់បន្តទៀត៕