រាជធានីភ្នំពេញ ៖ យ៉ាងហោចណាស់ មានមនុស្ស២នាក់ បានរងរបួស ក្នុងករណីគ្រោះថ្នាក់ចរាចរណ៍រវាងរថយន្តFord បុកម៉ូតូកង់បីឥណ្ឌា បណ្ដាលរងរបួស២នាក់ ត្រូវបានរថយន្ដសាមុយ ដឹកបញ្ជូនទៅកាន់មន្ទីរពេទ្យ ដើម្បីសង្រ្គោះបន្ទាន់ កាលពីវេលាម៉ោង១១ យប់ ថ្ងៃទី១៣ ខែសីហា ឆ្នាំ២០២១ ក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។

តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេឃើញបុរសម្នាក់ បើករថយន្ដFord មួយគ្រឿង ពាក់ស្លាកលេខ ភ្នំពេញ 2BB-1807 តាមបណ្ដោយផ្លូវបេតុង ក្នុងទិសដៅត្បូងទៅជើង មកដល់ផ្លូវបំបែក ក៏មានម៉ូតូកង់បីឥណ្ឌាមួយគ្រឿង ក៏បានបុកគ្នាបណ្ដាលឲ្យអ្នកជិះម្នាក់ជាមនុស្សស្រី ហោះចេញពីកង់បី ត្រូវរថយន្ដកិនចំជើង បណ្ដាលអោយរងរបួសធ្ងន់ ទាំង២នាក់ ត្រូវបានរថយន្ដសាមុយដឹកបញ្ជូនទៅមន្ទីរពេទ្យដើម្បីសង្រោះបន្ទាន់។

ក្រោយពេលកើតហេតុសមត្ថកិច្ចជំនាញចរាចរណ៍របស់អធិការនគរបាលខណ្ឌឫស្សីកែវ ធ្វើការវាស់វែង យករថយន្ដនិងម៉ូតូកង់បី ទៅរក្សាទុកទាំង២គ្រឿង នៅស្នងការដ្ឋាននគបាលចរាចរណ៍ផ្លូវគោក ដើម្បីដោះស្រាយគ្នានៅពេលក្រោយបន្តទៀត៕