រាជធានីភ្នំពេញ ៖ រឿងហេតុមិនគួរឲ្យជឿ ខណៈគ្រួសារមួយបានបាត់បង់សមាជិកគ្រួសារគ្រប់បែបយ៉ាង បាត់បង់ទាំងឪពុក បងប្រុសស្រីក៏ត្រូវសមត្ថកិច្ចចាប់ឃាត់ខ្លួន ខណៈកូនស្រីពៅក្នុងគ្រួសារ យំសោកដេកឱបសាកសពឪពុកជាទីស្រឡាញ់ ដែលមានព្រហ្មវិហារធម៌ចំពោះកូនៗ យ៉ាងរន្ធត់ចិត្ត ដោយមិនអាចទទួលយកបាន ទាំងដែលឪពុកនិងម្តាយក៏បានបែកគ្នា ទៅហើយ។

ជាក់ស្តែងកាលពីវេលាម៉ោង ១១ និង៣០នាទី ថ្ងៃទី១៣ ខែសីហា ឆ្នាំ២០២១ មានការភ្ញាក់ផ្អើលនៅចំណុចផ្ទះលេខ៥០៨ ក្នុងបន្ទប់ជាន់ទី១ ផ្លូវលេខ៨២BT ភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ រាជធានីភ្នំពេញ តែរហូតដល់ម៉ោង ៣ និង៤០នាទីរសៀល ទើបមានការភ្ញាក់ផ្អើលថា មានករណីឃាតកម្ម ដោយជំហ៊ានដំបូងសមត្ថកិច្ចបានឲ្យដឹងជាបឋមថា ជាករណីកូនប្រសារ និងកូនស្រី បានឈ្លោះគ្នាខ្លាំង រហូតឪពុកជាជនរងគ្រោះឃើញ ចូលទៅឃាត់ទាញកាំបិតទៅមក ក៏ត្រូវបានកូនប្រសារនោះចាក់ត្រូវចំនួន៣កាំបិតបណ្តាលឲ្យស្លាប់ ក្រោយបញ្ជូនទៅកាន់មន្ទីរពេទ្យរុស្ស៊ី ។ បន្ទាប់ពីឪពុកបានស្លាប់ កូនប្រុសស្រីទាំង២នាក់ ក៏បានទូរសព្ទរាយការណ៍ជូនសមត្ថកិច្ច ។

ភ្លាមៗកម្លាំងសមត្ថកិច្ចប៉ុស្តិ៍បឹងទំពុន២ រួមនិងសមត្ថកិច្ចនគរបាលព្រហ្មទណ្ឌខណ្ឌមានជ័យ សហការជាមួយនគរបាលកោសល្យវិច័យក្រុង បានចុះមកធ្វើការហ៊ុព័ទ្ធទីតាំងកើតហេតុ និងបានធ្វើការឃាត់ខ្លួនជនសង្ស័យជាកូនប្រសារ និងកូនស្រីរបស់ជនរងគ្រោះ យកទៅសាកសួរ និងពិនិត្យជុំវិញទីតាំងកើតហេតុ ដែលមានស្នាមឈាមជាច្រើនកន្លែងនៅក្នុងផ្ទះ រហូតដល់ជាន់ខាងក្រោម រួមទាំងកាំបិតផងដែរ ។

សមត្ថកិច្ចបានឲ្យដឹងថា ជនសង្ស័យទាំង២នាក់ ដែលត្រូវបានចាប់ឃាត់ខ្លួន ទី១មានឈ្មោះ ប៊ុន សូហ្វែរ ភេទស្រី អាយុ២៨ឆ្នាំ មុខរបរលក់ដូរតាមអនឡាញ និងជនសង្ស័យទី២ជាប្តីមានឈ្មោះ ហេង សៅរស្មី ភេទប្រុស អាយុ៣១ឆ្នាំ ដោយជនសង្ស័យឈ្មោះ ប៊ុន សូហ្វែរ គឺជាកូនបង្កើតរបស់ជនរងគ្រោះដែលស្លាប់ មានឈ្មោះ ប៊ុន សូវណ្ណា ភេទប្រុស អាយុ៥៩ឆ្នាំ ស្នាក់នៅផ្ទះកើតហេតុខាងលើ បានរងរបួសត្រូវចំចង្កេះខាងឆ្វេង១កន្លែង , ពោះ១កន្លែង, និងដើមទ្រូង ១កន្លែង។ ចំណែកជនសង្ស័យឈ្មោះ ហេង សៅរស្មី ជាកូនប្រសារ ។ ដកហូតបានកាំបិតសាំងគីម ដង ឈើ ១ដើម ។

សមត្ថកិច្ចខណ្ឌមានជ័យ បានប្រាប់ក្រុមការងារ TVFB ឲ្យដឹងថា ក្រោយសមត្ថកិច្ចបើកការសាកសួរយ៉ាងចិត្តទុកអស់រយៈពេលជាច្រើនម៉ោង ទើបដឹងថា ដំបូងឡើយជនសង្ស័យឈ្មោះ ប៊ុន សូហ្វែរ ជាកូនស្រីបង្កើតរបស់ជនរងគ្រោះ គឺបានទាស់ពាក្យសម្តីគ្នាយ៉ាងខ្លាំងជាមួយនឹងជនសង្ស័យម្នាក់ទៀតជាប្តីឈ្មោះ ហេង សៅរស្មី ហើយក៏បានវាយប្រតាយប្រតប់គ្នា ។ ពេលនោះ ជនសង្ស័យឈ្មោះ ប៊ុន សូហ្វែរ បានយកកាំបិតសាំងគីម ដងឈើ ដែលខ្លួនបានលាក់ទុកនៅក្បាលគ្រែដំណេក យកមកកាន់ក្នុងដៃ ជនរងគ្រោះជាឪពុកបង្កើតបានឃើញ ក៏ចូលទៅជួយឃាត់ ក៏ត្រូវចំឪពុក៣កាំបិត ហូរឈាមដាប រួចក៏ប្រញាប់នាំគ្នាយកឪពុកទៅមន្ទីរពេទ្យ ពេលទៅដល់មន្ទីរពេទ្យរុស្ស៊ី ដោយសារអាការៈធ្ងន់ធ្ងរពេក គ្រូពេទ្យបានប្រាប់ថា ឪពុកបានស្លាប់បាត់ទៅហើយ ទើបរាយការណ៍ជូនសមត្ថកិច្ចតែម្តង ។

សមត្ថកិច្ចបានបន្តឲ្យដឹងទៀតថា ចំណែកជនសង្ស័យទាំង២នាក់ ក៏ត្រូវបានលោកព្រះរាជអាជ្ញាអមសាលាដំបូងរាជធានីភ្នំពេញ បញ្ជាឲ្យឃាត់ខ្លួន យកកាន់អធិការដ្ឋាននគរបាលនគរបាលខណ្ឌមានជ័យ ដើម្បីឃាត់ខ្លួនបណ្តោះអាសន្ន និងកសាងសំណុំរឿងបញ្ជូនទៅកាន់តុលាការ ចាត់ការតាមច្បាប់បន្តទៀត ។ ចំណែកសាកសពឪពុកគឺប្រគល់ឲ្យកូនស្រី ឈ្មោះ ប៊ុន សូហ្វីន ធ្វើបុណ្យតាមប្រពៃណី នៅផ្ទះកើតហេតុតែម្តង ៕