រាជធានីភ្នំពេញ ៖ យោងតាមផេក អធិការដ្ឋាននគរបាលប៉ុស្តិ៍ទន្លេបាសាក់ បានឲ្យដឹងថា នៅវេលាម៉ោង ១ និង២០នាទី រំលងអាធ្រាត្រ ឈានចូលថ្ងៃទី ១២ ខែសីហា ឆ្នាំ២០២១ កម្លាំងប៉ុស្តិ៍ នគរបាលរដ្ឋបាល ទន្លេបាសាក់ បានឃាត់ខ្លួនជនសង្ស័យចំនួន០៣នាក់ ពាក់ព័ន្ធករណីលួចម៉ូតូរម៉កកង់បីឥណ្ឌា០១គ្រឿង នៅចំណុចមុខផ្ទះលេខ ៤៦ ផ្លូវព្រះនរោត្តម ក្រុម១២៥ ភូមិ ១៦ សង្កាត់ ទន្លេ បាសាក់ ខណ្ឌ ចំការមន រាជធានីភ្នំពេញ គ្រាន់តែឃើញសមត្ថកិច្ចភ្លាមៗ ក៏ជិះរត់តែម្តងទើបសមត្ថកិច្ចដេញចាប់ផ្អើលមួយចំហៀងខណ្ឌចំការមន ។

សមត្ថកិច្ចបានឲ្យដឹងថា ជនសង្ស័យ ដែលឃាត់បានរួមមាន ៖

១. ឈ្មោះ អ៊ឹម យូសែប ភេទប្រុស អាយុ ២០ឆ្នាំ ជនជាតិ ខ្មែរ ស្នាក់នៅផ្ទះលេខ ៣BD ផ្លូវលំ ភូមិបូរីកម្មករ សង្កាត់ ដង្កោ ខណ្ឌដង្កោ ភ្នំពេញ មុខរបរគ្មាន ។

២. ឈ្មោះ អឿ សម្បត្តិ ភេទប្រុស អាយុ ៣៣ ឆ្នាំ ជនជាតិ ខ្មែរ ស្នាក់នៅផ្ទះជួល ផ្លូវ១៥៤ សង្កាត់ ផ្សារ កណ្ដាល ទី២ ខណ្ឌដូនពេញ ភ្នំពេញ មុខរបរ គ្មាន ។

៣. ឈ្មោះ យ៉ាង ចំណាប់ ភេទប្រុស អាយុ ២៨ឆ្នាំ ជនជាតិខ្មែរ ស្នាក់នៅ ផ្ទះជួលលេខ៤១ ផ្ទះលេខ ១៤៨ សង្កាត់ ផ្សា រកណ្តាលទី២ ខណ្ឌដូនពេញ ភ្នំពេញ មុខរបរ គ្មាន ។ (ទាំង០៣នាក់ប្រើប្រាស់គ្រឿងញៀនជាប្រចាំ ) ។

ក្នុងនោះ វត្ថុតាងដកហូតបានរួមមាន ៖ រឺម៉កម៉ូតូកង់បីឥណ្ឌា០១គ្រឿង ពណ៌ស គ្មានស្លាកលេខ ។

ចំណែកជនរងគ្រោះឈ្មោះ តេង សុខនាង ភេទស្រី អាយុ៤៩ឆ្នាំ ជនជាតិខ្មែរ ស្នាក់នៅ ផ្ទះលេខ ២៤៩ ផ្លូវ ព្រះ នរោត្ដម ភូមិ ១៦ សង្កាត់ ទន្លេ បាសាក់ ខណ្ឌ ចំការមន ភ្នំពេញ មុខរបរ ជាងអ៊ុតសក់ ជាម្ចាស់កង់បីខាងលើ ដែលមានស្លាកលេខ ភ្នំពេញ 1HP-9412 ។

សមត្ថកិច្ចបានឲ្យដឹងទៀតថា មុនពេលកើតហេតុ វេលាម៉ោង៥ល្ងាច កូនរបស់ជនរងគ្រោះបានយកម៉ូតូរម៉កកង់បីឥណ្ឌារបស់ខ្លួន ទៅចតទុកនៅមុខផ្ទះលេខ ៤៦ ផ្លូវព្រះនរោត្តម ភូមិ ១៦ សង្កាត់ ទន្លេ បាសាក់ ខណ្ឌ ចំការមន ភ្នំពេញ ដែលនៅក្បែរផ្ទះរបស់ខ្លួនរួចបានចាក់សោរហើយក៏ដើរត្រឡប់មកផ្ទះវិញ។ រហូតដល់វេលាម៉ោង ០៥:០០នាទីទៀបភ្លឺ ជនរងគ្រោះបានមកមើលម៉ូតូរឺម៉កកង់បីឥណ្ឌាស្រាប់តែបាត់អត់ឃើញតែម្តង ទើបទៅឆែកមើលកាមេរ៉ាសុវត្ថិភាពឃើញជនសង្ស័យប្រហែល០២ ទៅ០៣នាក់ បានធ្វើសកម្មភាពលួចម៉ូតូកង់បីឥណ្ឌាយកទៅបាត់ ។

ប្រភពដដែលបន្តថា លុះថ្ងៃ ១២ ខែសីហា ឆ្នាំ២០២១ វេលាម៉ោង ០១:២០នាទី រំលងអាធ្រាត្រ កម្លាំងប៉ុស្តិ៍គរបាលរដ្ឋបាលទន្លេបាសាក់ បានល្បាតឃើញរម៉កកង់បីឥណ្ឌា ពណ៌ស០១គ្រឿង គ្មានស្លាកលេខ ជិះដោយជនសង្ស័យចំនួន០៣នាក់ នៅមុខផ្សារអ៊ីអន១ ដោយមានការសង្ស័យកម្លាំងបានហៅឲ្យឈប់ដើម្បីសុំត្រួតពិនិត្យ ស្រាប់តែក្រុមជនសង្ស័យមិនព្រមឈប់ ហើយបើករត់គេចខ្លួន មកដល់ចំណុចមុខផ្ទះលេខ ២៣១ ផ្លូវព្រះនរោត្តម ភូមិ ១៦ សង្កាត់ ទន្លេ បាសាក់ ខណ្ឌ ចំការមន ភ្នំពេញ ក៏ឃាត់ខ្លួនបានជនសង្ស័យឈ្មោះ អ៊ឹម យូសែប នឹងឈ្មោះ អឿ សម្បត្តិ យកមកកាន់ស្នាក់ការប៉ុស្តិ៍ដើម្បីសាកសួរ រីឯបក្ខពួកម្នាក់ទៀតរត់គេខ្លួនបាត់ទៅ ។

ក្រោយពីការសាកសួរជនសង្ស័យឈ្មោះ អ៊ឹម យូសែប បានសារភាពថាខ្លួនបានខ្ចីម៉ូតូរឺម៉កកង់បីឥណ្ឌាពីឈ្មោះ យ៉ាន ចំណាប់ នៅម្តុំផ្សារកណ្តាល ។ រហូតដល់វេលាម៉ោង ១១:៣០នាទីថ្ងៃត្រង់ ថ្ងៃខែឆ្នាំដដែល កម្លាំងបានធ្វើការស្រាវជ្រាវបន្តឃាត់បានបក្ខពួកជនសង្ស័យម្នាក់ទៀតឈ្មោះ យ៉ាន ចំណាប់ នៅចំណុចផ្ទះជួលលេខ៤១ ផ្លូវ១៤៨ សង្កាត់ ផ្សារ កណ្ដាល ទី២ ខណ្ឌដូនពេញ ភ្នំពេញ រួចយកមកកាន់ស្នាក់ការប៉ុស្តិ៍ដេីម្បីសាកសួរ នឹងចាត់ការតាមផ្លូវច្បាប់តែម្តង ។

បច្ចុប្បន្ន ជនសង្ស័យ ទាំង៣នាក់ ត្រូវបានបញ្ជូនទៅកាន់អធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូនខ្លួនទៅកាន់តុលាការ ចាត់ការបន្ត តាមនីតិវិធីច្បាប់ ៕