រាជធានីភ្នំពេញ ៖ ពិតជារន្ធត់ណាស់ នារីម្នាក់ បានស្លាប់យ៉ាងរន្ធត់ ខណៈ២នាក់ទៀត រងរបួសធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈកំពុងជិះម៉ូតូតាមដងផ្លូវ ក៏ត្រូវបានរថយន្តម៉ាកកូរ៉ូឡា បុកពេញទំហឹង ខណៈរថយន្តវិញខ្ទេចមើលលែងយល់តែម្តង កាលពីវេលាម៉ោង ១២ យប់ ឈានចូលថ្ងៃទី១៦ ខែសីហា ឆ្នាំ២០២១ នៅចំណុចផ្លូវជាតិលេខ៤ ក្នុងសង្កាត់ កំបូល ខណ្ឌកំបូល រាជធានីភ្នំពេញ។

សមត្ថកិច្ចបានឲ្យដឹងថា សាកសពជនរងគ្រោះមានឈ្មោះ ស្រីឆយ អាយុ១៧ឆ្នាំ មុខរបរធ្វើការនៅហាង និងជនរងគ្រោះ២នាក់ទៀត ម្នាក់មានឈ្មោះ ស្រីនីត អាយុ១៧ឆ្នាំ របួសធ្ងន់ និងម្នាក់ទៀតឈ្មោះ បញ្ញា ភេទប្រុស។ អ្នកទាំង៣ ស្នាក់នៅជិតភ្នំបាសិដ្ឋ។

តាមប្រភពព័ត៌មានពីជុំវិញទីតាំងកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្តម៉ាកកូរ៉ូឡា មួយគ្រឿង ពាក់ស្លាកលេខ ភ្នំពេញ 2A-4705 ធ្វើដំណើរក្នុងទិសដៅពីកើតមកលិច លុះដល់ចំណុចកើតហេតុ ត្រង់ផ្លូវជាតិលេខ ៤ ម្តុំលក់សាច់ក្រក ក៏បានរេចង្កូតទៅបុកនឹងម៉ូតូហុងដាប៊ីតមួយគ្រឿង ដែលពាក់ស្លាកលេខ កណ្ដាល 1AL-9661 ជិះគ្នា ៣ នាក់ មានស្រី២នាក់ ប្រុសម្នាក់ ពេញទំហឹង បណ្ដាលឲ្យនារីម្នាក់ ស្លាប់បាត់បង់ជីវិតយ៉ាងរន្ធត់បំផុត និង២នាក់ទៀតរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។

ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការនគរបាលខណ្ឌកំបូល បានចុះមកធ្វើការវាស់វែង និងដេញតាមឃាត់បាន រថយន្តបង្កនិងអ្នកបើកបរ យកទៅកាន់អធិការដ្ឋាននគរបាលខណ្ឌកំបូល ដើម្បីសាកសួរបន្តភ្លាមៗ និងយករថយន្ត រួមទាំងម៉ូតូជនរងគ្រោះ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត និងប្រគល់សពឲ្យសាច់ញាតិធ្វើបុណ្យតាមប្រពៃណី៕