រាជធានីភ្នំពេញ ៖ រថយន្តហ្វតមួយគ្រឿង រងការខូចខាតយ៉ាងដំណំ ខណៈកំពុងបើកបត់ត្រឡប់ក្រោយ ខ្វះការប្រុងប្រយត្ន័ ក៏ត្រូវបានរថយន្តដឹកឥដ្ឋ ដែលបើកលឿនមិនប្រយត្ន័ដូចគ្នា មកពីក្រោយជាន់ហ្វ្រាំងមិនទាន់ បុកពេញទំហឹង កាលពីវេលាម៉ោង៨ព្រឹក ថ្ងៃទី១៥ ខែសីហា ឆ្នាំ២០២១ លើផ្លូវភ្នំពេញហាន់ណយ ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តម៉ាកហ្វតមួយគ្រឿង ពណ៌ស ពាក់ស្លាកលេខ ភ្នំពេញ 2BF- 2933 បើកដោយបរដោយបុរសចំណាស់ម្នាក់ ដោយធ្វើដំណើរតាមបណ្តោយផ្លូវភ្នំពេញហាន់ណយពីជើងទៅត្បូង លុះមកដល់ចំណុចកើតហេតុ ជាចំណុចផ្លូវដាច់សម្រាប់ឆ្លង ក៏បានបត់ត្រឡប់ ភ្លាមៗ ក៏ត្រូវបានរថយន្តបែនដឹកឥដ្ឋមួយគ្រឿង ពាក់ស្លាកលេខ ភ្នំពេញ 3D-0284 បើកដោយបុរសម្នាក់ និងរួមដំណើរជាមួយកម្មករច្រើននាក់ទៀត ក្នុងទិសដៅស្របគ្នាជាន់ហ្វ្រាំងមិនស៊ី បុកពាក់កណ្តាលគូទរថយន្តហ្វត ពេញទំហឹង បណ្តាលឲ្យរថយន្តហ្វតរងការខូចខាត កៀបជាប់គ្នាទៅមុខលែងរួច តែសំណាងគ្មានអ្នករបួសនោះទេ។

ក្រោយកើតហេតុ ភាគីខាងរថយន្តហ្វត និងភាគីរថយន្តដឹកឥដ្ឋ បានធ្វើការសម្របសម្រួលគ្នានៅនឹងកន្លែងកើតហេតុ តែមិនត្រូវរ៉ូវគ្នា ក៏សម្រេចឲ្យសមត្ថកិច្ចជំនាញផ្នែកចរាចរណ៍ ធ្វើការវាស់វែងយករថយន្តទាំង២គ្រឿង ទៅរក្សាទុកនៅអធិការដ្ឋាននគរបាលខណ្ឌសែនសុខ រង់ចាំការដោះស្រាយគ្នាទៅតាមនិតិវិធីនៅពេលក្រោយ ៕