រាជធានីភ្នំពេញ ៖ មានការភ្ញាក់ផ្អើលពីសំណាក់បងប្អូនប្រជាពលរដ្ឋ ខណៈប្រទះឃើញបុរស២នាក់ បានដេកសន្លប់ស្តូកស្តឹងក្នុងថ្លុកឈាម រៀងខ្លួន ក្រោយត្រូវបានក្មេងស្ទាវមួយក្រុមទៀត វាយប្រតាយប្រតប់គ្នាជាភាគីបុរសទាំង២នេះ ហើយក៏រត់អស់ កាលពីយប់ ឈានចូលថ្ងៃទី១៨ ខែសីហា ឆ្នាំ២០២១ នៅចំណុចខាងក្រោយសោនក្លឹប នៅតាមបណ្ដោយផ្លូវបេតុង ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះទាំង២នាក់ នៅមិនទាន់ស្គាល់អត្តសញ្ញាណ ពិតប្រាកដនៅឡើយ បានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ ។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គាត់បានឃើញយុវជនមួយក្រុម បានវាយប្រតាយប្រតប់គ្នា ជាមួយបុរស២នាក់ នៅក្នុងអគារគេទុកចោលមួយកន្លែង ក្រោយមកស្រាប់តែឃើញ មានបុរស២នាក់ បានដេកដួលក្នុងថ្លុកឈាមទៅហើយ ចំណែកភាគីម្ខាងទៀត នាំគ្នារត់គេចខ្លួនបាត់អស់តែម្តង ទើបប្រញាប់រាយការណ៍ជូនសមត្ថកិច្ចខណ្ឌចំការមន ដើម្បីចុះមកអន្តរាគមន៍ និងទាក់ទងហៅរថយន្តសាមុយ មកដឹកយកទៅសង្គ្រោះនៅមន្ទីរពេទ្យ និងបើកការស្រាវជ្រាវបន្តទៀត ដើម្បីតាមចាប់ភាគីម្ខាងទៀត មកដោះស្រាយគ្នាតាមច្បាប់ ៕