រាជធានីភ្នំពេញ ៖ ក្រោយចាក់ដីលុបយូរឆ្នាំមកហើយ ពេលនេះយល់ចិត្តគ្នា ពលរដ្ឋព្រមឲ្យអាជ្ញាធរកាយបើកផ្លូវទឹក ដែលជាប្រឡាយមេធំ រំដោះការជន់លិចក្នុងភូមិសាស្ត្រពោធិ៍សែនជ័យ រាជធានីភ្នំពេញ។

ប្រភពព័ត៌មានពីអាជ្ញាធរខណ្ឌពោធិ៍សែនជ័យបាន ឲ្យដឹងថា ប្រឡាយទឹកមេ នេះកន្លងមកត្រូវបានប្រជាពលរដ្ឋមួយចំនួន បានចាក់ដីសាងសង់ រំលោភលើប្រឡាយមេរំដោះទឹក ដែលបង្កឲ្យមានការជន់លិចរាប់ឆ្នាំតែម្តង ជាក់ស្តែងដូចឃើញស្រាប់ ពលរដ្ឋខ្លះបានចាក់ដីរំលោភលុបឡើងពេញទៅហើយ សួរថាទឹកហូរទៅណាកើត ហើយការជន់លិចម្តងៗ គឺលិចទាំងនៅផ្សារពោធិ៍ចិនតុង លិចទាំងវត្តពោធិ៍ចិនតុង ,លិចផ្ទះសម្បែងប្រជាពលរដ្ឋ ដែលស្ថិតក្នុងភូមិប៉ប្រកខាងជើង សង្កាត់កាកាបទី១ ថែមទាំងលិចផ្លូវសាធារណៈថែមទៀត ដោយលិចម្តងៗ ១ខែជាងឯណោះ ទើបស្រកអស់ ។

អាជ្ញាធរបានបន្តថា ជាក់ស្តែង ក្រោយពីចាក់ដីលុបជាយូរឆ្នាំមកហើយនោះ ពេលនេះ យល់ចិត្តគ្នា ប្រជាពលរដ្ឋព្រមឲ្យកាយបើកផ្លូវទឹក និង ដោយមានការយកចិត្តទុកដាក់ ពី ឯកឧត្តម ឃួង ស្រេង អភិបាលរាជធានីភ្នំពេញ និងលោក ហែម ដារិទ្ធិ អភិបាលខណ្ឌពោធិ៍សែនជ័យ នាព្រឹកថ្ងៃទី១៨ ខែសីហា ឆ្នាំ២០២១នេះ ក្រុមការងាររដ្ឋបាលខណ្ឌពោធិ៍សែនជ័យ សហការជាមួយជំនាញដែនដីខណ្ឌ ចុះវាស់វែង ព្រំប្រឡាយមេ អមផ្លូវរថភ្លើង ស្ថិតក្នុងភូមិប៉ប្រកខាងជើង សង្កាត់ចោមចៅទី១ ប្រឡាយមេ អមផ្លូវរថភ្លើង ហើយពេលនេះ គឺបានស្ដា មកដល់ព្រំប្រទល់ជាប់ខណ្ឌសែនសុខហើយ ដោយការស្តារនេះមានរយៈពេល១០ជាងមកហើយ ។

ទន្ទឹមនឹងនោះ អាជ្ញាធរ ក៏បានសូមណូមពរដល់បងប្អូនប្រជាពលរដ្ឋទាំងអស់ មេត្តាជួយសហការ និងសូមកុំសាងសង់លំនៅដ្ឋាន ឬសាងសង់អ្វីមួយ រំលោភចូលប្រឡាយមេរបស់រដ្ឋ ដែលជាហេតុធ្វើឲ្យប្រព័ន្ធរំដោះទឹក ហូររំដោះជំនន់ទឹកភ្លៀងមិនទាន់ ៕