រាជធានីភ្នំពេញ ៖ សមត្ថកិច្ចបានធ្វើការប្រដេញចាប់ឃាត់ខ្លួនបានជនសង្ស័យចំនួន២នាក់ខណៈធ្វើសកម្មភាពឆក់កាបូបពីនារីម្នាក់ ដែលកំពុងជិះម៉ូតូតាមដងផ្លូវ តែមិនបានសម្រេច ត្រូវបានជនរងគ្រោះស្រែកចោរៗ ផ្អើលសមត្ថកិច្ចដេញចាប់ខ្លួនបាន២នាក់ភ្លាមៗ កាលពីវេលាម៉ោង ៣ និង២០នាទី រសៀលថ្ងៃទី១៨ ខែសីហា ឆ្នាំ២០២១ នៅសាលាបឋមសិក្សាយ៉ាម៉ាមេកូ ផ្លូវបេតុង សង្កាត់អូបែកក្អម ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទាំង២នាក់ខាងលើ រួមមាន ៖ ទី១ឈ្មោះ អូន សុជាតិ ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅម្តុំពោធិ៍ចិនតុង ខណ្ឌពោធិ៍សែនជ័យ ។ ចំណែកជនសង្ស័យទី២ឈ្មោះ ខេន សុខ ភេទប្រុស អាយុ២៧ ឆ្នាំ មុខរបរមិនពិតប្រាកដ ស្នាក់នៅជាមួយគ្នា។ដកហូតបានម៉ូតូមួយគ្រឿងម៉ាក ហុងដាសេ១២៥ ពាក់ស្លាកលេខ ភ្នំពេញ 1IP-2967 ដែលជិះធ្វើសកម្មភាព ។

តាមប្រភពព័ត៌មានពីជនរងគ្រោះ ឈ្មោះ អាលក្ខ ភេទស្រី បានឲ្យដឹងថា មុនពេលកើតហេតុ ខ្លួនបានជិះម៉ូតូម៉ាកស្កុបពី ពណ៌ស មួយគ្រឿង ពាក់ផ្លាកលេខ ភ្នំពេញ 1DH- 2223 ជិះម្នាក់ឯងតាមបណ្តោយផ្លូវបេតុង មកដល់ជិតពេទ្យរ៉ូយ៉ាល់ ក៏មានជនសង្ស័យ២នាក់ ជិះម៉ូតូម៉ាកហុងដាសេ១២៥ ស៊េរីឆ្នាំ ២០២០មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1IP-2967 មកពីក្រោយ ធ្វើសកម្មភាពឆក់កាបូបរបស់ជនរងគ្រោះ តែមិនបានសម្រេច ត្រូវបានជនរងគ្រោះស្រែកចោរៗ ផ្អើលដល់សមត្ថកិច្ចកំពុងល្បាតឃើញជាក់ស្តែងក៏ដេញតាមចាប់ខ្លួនបាន នៅជិតសាលាបឋម យ៉ាម៉ាយូ ទាំង២នាក់ ដកហូតម៉ូតូមួយគ្រឿង បញ្ជូនមកកាន់ប៉ុស្តិ៍ទឹកថ្លា ដោយមានជនរងគ្រោះមកដាក់ពាក្យបណ្តឹងផងដែរ។

បច្ចុប្បន្នជនសង្ស័យទាំង២នាក់ ត្រូវបានសមត្ថកិច្ចបញ្ជូនខ្លួនទៅកាន់ អធិការដ្ឋាននគរបាលខណ្ឌសែនសុខ ដើម្បីឃាត់ខ្លួនបណ្តោះអាសន្ន កសាងសំណុំរឿងចាត់ការតាមច្បាប់បន្តទៀត ៕