រាជធានីភ្នំពេញ ៖ រថយន្តហាយឡែនឌ័រ មួយគ្រឿង បានបុករះចូលផ្ទះបងប្អូនប្រជាពលរដ្ឋ បណ្ដាលឲ្យស្ត្រីម្នាក់ រងរបួសធ្ងន់ ត្រូវបានរថយន្ដសាមុយយកទៅមន្ទីរពេទ្យដើម្បីសង្រោះបន្ទាន់ កាលពីវេលាម៉ោង១០យប់ ថ្ងៃទី២២ ខែសីហា ឆ្នាំ២០២១ នៅតាមបណ្ដោយផ្លូវ ១០៣ ដែលស្ដិតនៅសង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋដែលនៅកន្លែងកើតហេតុ បានអោយដឹងថា មុនពេលកើតហេតុ គេបានឃើញរថយន្ដហាយឡែនឌ័រមួយគ្រឿង ដែលពាក់ស្លាកលេខ សៀមរាប 2B-2507 បើកបរយ៉ាងលឿនក្នុងទិសដៅពីជើងទៅត្បូង ក៏បានរេចង្កូតទៅបុករះផ្ទះបងប្អូនប្រជាពលរដ្ឋបណ្ដាលឲ្យស្រ្ដីម្នាក់ដែលអង្គុយនៅមុខផ្ទះ ត្រូវរថយន្ដបុកបណ្ដាលអោយរងរបួសធ្ងន់ ត្រូវបានរថយន្ដសាមុយដឹកបញ្ចូនទៅមន្ទីរពេទ្យដើម្បីសង្រ្គោះបន្ទាន់។

ក្រោយពេលកើតហេតុ សមត្ថកិច្ចជំនាញចុះមកធ្វើការវាស់វែង យករថយន្តបង្កទៅរក្សាទុកនៅ ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនមកធ្វើការដោះស្រាយគ្នាតាមផ្លូវច្បាប់៕