រាជធានីភ្នំពេញ ៖ ស្ត្រីម្នាក់ បានរងរបួសធ្ងន់ ខណៈកំពុងធ្វើដំណើរតាមដងផ្លូវ ត្រូវបានរថយន្តកូរ៉េមួយគ្រឿង ដាច់ហ្វ្រាំងជ្រុលចង្កូតមកបុកនឹងម៉ូតូមួយគ្រឿង អូសជាប់ពីក្រោមរថយន្ត បន្តទៅបុកជាមួយនឹងរថយន្តក្រឡុកស៊ីម៉ង់ត៍មួយគ្រឿងទៀត កាលពីវេលាម៉ោង៨យប់ ថ្ងៃទី២១ ខែសីហា ឆ្នាំ២០២១ នៅចំណុចផ្លូវ ២៨៩ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តកូរ៉េមួយគ្រឿង ពាក់ស្លាកលេខ ភ្នំពេញ 2AU-9426 បានបុកម៉ូតូឌ្រីមសេ១២៥ មួយគ្រឿង ពាក់ស្លាកលេខភ្នំពេញ 1AG-6901 បុកពេញមួយទំហឹង បណ្តាលឲ្យស្ត្រីម្នាក់ រងរបួសធ្ងន់ ត្រូវបានរថយន្តសាមុយ ដឹកបញ្ជូនទៅមន្ទីរពេទ្យ ដើម្បីសង្គ្រោះបន្ទាន់ ។ ភ្លាមនោះរថយន្តកូរ៉េ មិនទាន់អស់ល្បឿន ក៏បានទៅបុកនឹងរថយន្តក្រឡុកស៊ីម៉ងត៍ មួយគ្រឿងទៀត ដែលចតចោលនៅចិញ្ចើមផ្លូវបណ្ដាលឲ្យរងការខូចខាតយ៉ាងដំណំមួយកំណាត់ខាងមុខ។

ក្រោយពេលកើតហេតុ សមត្ថកិច្ចជំនាញបានចុះមកធ្វើការវាស់វែង យករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនមកធ្វើការដោះស្រាយគ្នាតាមផ្លូវច្បាប់៕