រាជធានីភ្នំពេញ ៖ នគរបាលខណ្ឌដង្កោ បានធ្វើការចាប់ឃាត់ខ្លួនជនសង្ស័យម្នាក់ ពាក់ព័ន្ធករណីលួចរថយន្ត កាលពីថ្ងៃទី២២ ខែសីហា ឆ្នាំ២០២១ វេលាម៉ោង១៩និង៥០នាទី ត្រង់ចំណុចផ្ទះលេខ១០៧ ផ្លូវលេខ៧ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។

លោកវរសេនីយ៍ឯក ជឹម ស៊ីថា អធិការនគរបាលខណ្ឌ បានប្រាប់ក្រុមការងារ TVFB ឲ្យដឹងថា ជនរងគ្រោះឈ្មោះ កន វិស័យ ភេទប្រុស អាយុ៣២ឆ្នាំ ជនជាតិខ្មែរ មុខរបរអាជីវករ ទីលំនៅផ្ទះលេខ១៣៨E ផ្លូវ៣៦៤ ស្ថិតនៅភូមិ៧ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ។ ចំណែកជនសង្ស័យឈ្មោះ ពៅ បណ្តូលពេជ្រ ហៅដា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះ២២២ ផ្លូវលេខ៣ ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។

ក្នុងនោះសមត្ថកិច្ចដកហូតបាន រថយន្តម៉ាក FORD RANGER ពណ៌ប្រផេះ ពាក់ស្លាកលេខ ភ្នំពេញ 2AT-3300 ចំនួន០១គ្រឿង, កាំបិតប៉័ងតោចំនួន០១។

លោកអធិការបានបន្តឲ្យដឹងថា កាលពីថ្ងៃទី២២ ខែសីហា ឆ្នាំ២០២១ វេលាម៉ោង៧យប់ ជនរងគ្រោះ បានបើករថយន្ត០១គ្រឿងម៉ាក FORD RANGER ពណ៌ប្រផេះ ពាក់ផ្លាកលេខ ភ្នំពេញ 2AT-3300 ចេញពីកន្លែងរណ្តៅដីនៅម្តុំបឹងតាមោក ស្ថិតនៅខណ្ឌព្រែកព្នៅ រាជធានីភ្នំពេញ ជូនគូដណ្តឹង មកផ្ទះលេខ១០៧ ផ្លូវលេខ៧ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។ ពេលមកដល់ជនរងគ្រោះក៏បានចុះពីលើរថយន្តជូនគូដណ្តឹងចូលផ្ទះ ដោយមិនបានពន្លត់ម៉ាស៊ីនរថយន្តទេ រហូតដល់វេលាម៉ោង៧និង៥០នាទី ថ្ងៃខែឆ្នាំដដែល ជនរងគ្រោះបានដើរចេញមករករថយន្តវិញ ក៏បានឃើញជនសង្ស័យបានលួចបើករថយន្តរបស់ជនរងគ្រោះទៅមុខ ហើយជនរងគ្រោះក៏បានរត់ទៅតាមបើកទ្វាររថយន្តចាប់ទាញជនសង្ស័យ ចេញពីលើរថយន្តបានឃើញកាំបិតប៉័ងតោចំនួន០១ដែលជនសង្ស័យទុកនៅក្បែរចង្កឹះលេខរថយន្ត ហើយជនរងគ្រោះក៏បានស្រែកឆោឡោឲ្យគេជួយ។ ហើយក៏មានកម្លាំងសមត្ថកិច្ចប៉ុស្តិ៍នគរបាលរដ្ឋបាលដង្កោ ដែលកំពុងជិះម៉ូតូល្បាតក្បែរនោះបានជួយអន្តរាគមន៍ ឃាត់ខ្លួនជនសង្ស័យ រួមនិងវត្ថុតាងយកមកធ្វើការសាកសួរនៅប៉ុស្តិ៍នគរបាលរដ្ឋបាលដង្កោ។

បច្ចុប្បន្នជនសង្ស័យខាងលើត្រូវបានឃុំខ្លួនជាបណ្តុះអាសន្ន នៅអធិការរដ្ឋាននគរបាលខណ្ឌដង្កោ និងកសាងសំណុំរឿងចាត់ការតាមនីតិវិធីច្បាប់៕មេសា