រាជធានីភ្នំពេញ ៖ ជនសង្ស័យម្នាក់ ធ្វើសកម្មភាព លួចកាច់កម៉ូតូរបស់ប្រជាពលរដ្ឋ នៅម្ដុំផ្សារថ្មី ២ បានសម្រេច រួចដូរស្លាកលេខ តែស៊យធំ ត្រូវម្ចាស់គេតាមទាន់ ចាប់ឃាត់ខ្លួនប្រគល់អោយសមត្ថកិច្ច បង្កការភ្ញាក់ផ្អើល កាលពីវេលាម៉ោង ៣ទៀបភ្លឺ ថ្ងៃទី២៦ ខែសីហា ឆ្នាំ២០២១ នៅក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។

ប្រភពព័ត៌មានពីម្ចាស់ម៉ូតូ ដែលត្រូវជនសង្ស័យលួចយកទៅ បានឲ្យដឹងថា មុនពេលកើតហេតុ ជនសង្ស័យមួយក្រុម បានលួចម៉ូតូរបស់ក្រុមហ៊ុន វិរៈប៊ុនថាំ សាខា ផ្សារថ្មី ដែលទុកនៅខាងមុខក្រុមហ៊ុន ដោយជនសង្ស័យទាំងនោះ ជិះមួយម៉ូតូមួយគ្រឿង មានគ្នា៣នាក់ បានធ្វើសកម្មភាពចូលមកកាច់កម៉ូតូ Scoopy មួយគ្រឿង បានសម្រេច ហើយជិះរត់ យកទៅដូរស្លាកលេខ ប៉ុន្តែត្រូវបានម្ចាស់ម៉ូតូ ជិះតាមមកដល់ខាងមុខសាលាអនុវត្ត តាមបណ្ដោយផ្លូវ២៧១ ក៏ឃើញជនសង្ស័យ កំពុងជិះតាមផ្លូវ ទើបស្រែកឆោឡោ ឲ្យគេជួយ ចាប់ក៏ត្រូវបានបងប្អូនប្រជាពលរដ្ឋចាប់បានវាយឡើងចាស់ដៃនិងចាប់ប្រគល់អោយសមត្ថកិច្ច នាំយកទៅកាន់ប៉ុស្តិ៍នគរបាលផ្សារថ្មី២ ដើម្បីចាត់ការតាមនីតិវិធីច្បាប់ ៕