រាជធានីភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើង រវាងម៉ូតូនិងរថយន្ត បុកគ្នាត្រង់ស្តុបបែកជា៤ បណ្តាលឲ្យមនុស្ស២នាក់ របួសធ្ងន់ ហើយបន្តល្បឿនបើករត់បាត់ សល់តែស្លាកលេខ ភ្នំពេញ 2AF-2545 កាលពីវេលាម៉ោង២យប់រំលងអាធ្រាត្រ ឈានចូលថ្ងៃទី២៦ ខែសីហា ឆ្នាំ២០២១ លើផ្លូវកម្ពុជាក្រោម ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញម៉ូតូម៉ាក ស្កុបពី ពណ៌ខ្មៅ ពាក់ស្លាកលេខ ភ្នំពេញ 1I-6393 ជិះពីកើតទៅលិចឌុបគ្នាដោយបុរស២នាក់ លុះដល់ចំណុចកើតហេតុ ក៏មានរថយន្តពាក់ស្លាកលេខ ភ្នំពេញ 2AF-2545 បុកពេញទំហឹង ខ្ទាតប៉ើងទៅម្ខាង របួសធ្ងន់២នាក់ ហើយបន្តល្បឿនជិះរត់បាត់ សល់តែស្លាកលេខ ។ ចំណែកអ្នករបួសធ្ងន់ ត្រូវបានសមត្ថកិច្ចបញ្ជូនតាមរថយន្តសាមុយទៅកាន់មន្ទីរពេទ្យ ។

ដោយឡែកសម្រាប់ម៉ូតូ និងស្លាកលេខរថយន្ត ត្រូវបានសមត្ថកិច្ចយកទៅកាន់អធិការដ្ឋាននគរបាលខណ្ឌ៧មករា ដើម្បីស្រាវជ្រាវរកអ្នកបើកបររថយន្តខាងលើ មកដោះស្រាយគ្នាតាមច្បាប់ជាមួយជនរងគ្រោះ ៕