ខេត្តកោះកុង ៖ យោងតាមផេក ស្នងការដ្ឋាននគរបាលខេត្តកោះកុង បានឲ្យដឹងថា ជនសង្ស័យម្នាក់ បាននិងកំពុងរត់គេចខ្លួន ពេលនេះប៉ូលិសកំពុងតែតាមចាប់ ក្រោយធ្វើសកម្មភាព ប៉ុនប៉ងរំលោភទៅលើក្មេងស្រីអាយុ១៥ឆ្នាំម្នាក់ កាលពីវេលាម៉ោង១ និង១៥នាទី យប់ឈានចូលថ្ងៃទី២៧ ខែសីហា ឆ្នាំ២០២១ នៅចំណុចភូមិព្រែកស្វាយ ឃុំថ្មដូនពៅ ស្រុកថ្មបាំង ខេត្តកោះកុង ។

សមត្ថកិច្ចបានឲ្យដឹងថា ជនសង្ស័យដែលកំពុងរត់គេចខ្លួននេះ មានឈ្មោះ ចាន់ សំរិទ្ធ ភេទប្រុស អាយុ១៧ឆ្នាំ មានទីលំនៅភូមិព្រែកស្វាយ ឃុំថ្មដូនពៅ ស្រុកថ្មបាំង ខេត្តកោះកុង ដែលបានប៉ុនប៉ងចាប់រំលោភទៅលើក្មេងស្រីរងគ្រោះ អាយុ ១៥ ឆ្នាំ ដែលមានទីលំនៅភូមិឃុំជាមួយគ្នា ពេលព្រឹកទើបឪពុកម្តាយជនរងគ្រោះមកដាក់ពាក្យបណ្តឹង នៅប៉ុស្តិ៍នគរបាលរដ្ឋបាលឃុំថ្មដូនពៅ ។

ទោះបីជាជនសង្ស័យកំពុងរត់គេចខ្លួនក្តី ពេលនេះសមត្ថកិច្ចកំពុងធ្វើការស្រាវជ្រាវ ដើម្បីឃាត់ខ្លួនយកមកចាត់ការតាមច្បាប់បន្តទៀត ៕