ខេត្តព្រះសីហនុ ៖ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា សមត្ថកិច្ចនៃស្នងការដ្ឋាននគរបាលខេត្តព្រះសីហនុ បានធ្វើការស្រាវជ្រាវចាប់ឃាត់ខ្លួនជនសង្ស័យចំនួន ៣នាក់ ពាក់ព័ន្ធករណីលួចទូដែក ដែលមានលុយ ១១ម៉ឺនដុល្លារអាមេរិក កាលពីវេលាម៉ោង ៣ទៀបភ្លឺ ថ្ងៃទី២៥ ខែសីហា ឆ្នាំ២០២១ ក្នុងបន្ទប់លេខ៨៧២០ នៃកាស៊ីណូ ឆាងឆឹង ស្ថិតនៅភូមិ៣ សង្កាត់៤ ក្រុង-ខេត្តព្រះសីហនុ ។
ការបង្ក្រាបនេះ គឺមានការដឹកនាំបញ្ជារ ពីសំណាក់ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក្រោយមានបុរសជនជាតិចិនម្នាក់បានមកដាក់ពាក្យបណ្តឹង នៅវេលាម៉ោង ១២និង៣០នាទី ថ្ងៃទី២៨ ខែសីហា ឆ្នាំ២០២១ ថាមានចោរបានលួចចូលទៅក្នុងបន្ទប់លេខ៨៧២០ នៃកាស៊ីណូ ឆាងឆឹង លួចទូរដែក០១គ្រឿងគេចខ្លួនបាត់ ដោយនៅក្នុងទូរដែកនោះមានលុយ ១១០,០០០$ (ដប់មួយម៉ឺនដុល្លារអាមេរិក) និងនាឡិការដៃ០១គ្រឿង។
បន្ទាប់ពីទទួលបានពាក្យបណ្តឹងរបស់ជនរងគ្រោះ កម្លាំងជំនាញផែនការងារនគរបាលព្រហ្មទណ្ឌ បានធ្វើការស្រាវជ្រាវយ៉ាងយកចិត្តទុកដាក់ រហូតដល់វេលាម៉ោង៨យប់ ទើបធ្វើការឃាត់ខ្លួនបានជនសង្ស័យចំនួន០៣នាក់។
បច្ចុប្បន្នជនសង្ស័យខាងលើកំពុងឃាត់ខ្លួន ដើម្បីធ្វើការសាកសួរ និងចាត់ការតាមផ្លូវច្បាប់ ៕
