រាជធានីភ្នំពេញ ៖ ពិតជាគួរឲ្យសង្វេគណាស់ បុរស២នាក់ បានឡើងពីស្រុកកំណើតខាងប្រពន្ធ ជិះម៉ូតូមានមាន់២ក្បាល និងផ្លែក្រសាំង១បេ មកជាមួយ មកលេងប្រពន្ធផង រកការងារធ្វើនៅភ្នំពេញផង អកុសល ត្រូវបានរថយន្តក្រឡុកស៊ីម៉ងត៍ បុកប៉ើងធ្លាក់ចូលក្នុងប្រឡាយទឹក ស្លាប់ម្នាក់យ៉ាងរន្ធត់ និងម្នាក់ទៀត រងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។ ចំណែករថយន្តបានរត់គេចខ្លួនបាត់ស្រមោល បង្កការភ្ញាក់ផ្អើលកាលពីវេលាម៉ោង ១០និង៣០នាទីព្រឹក ថ្ងៃទី២៩ ខែសីហា ឆ្នាំ ២០២១ នៅតាមមហាវិថីឈ្នះឈ្នះ ក្នុងភូមិកប់ស្រូវតូច សង្កាត់គោករការ ខណ្ឌព្រែកព្នៅ រាជធានីភ្នំពេញ ។

សមត្ថកិច្ចបានឲ្យដឹងថា សពជនរងគ្រោះមានឈ្មោះ គង់ គា ហៅគង់ សីហា ភេទប្រុស អាយុ ៣៤ឆ្នាំ ស្នាក់នៅស្រុកកំពង់ស្វាយ ខេត្តកំពង់ធំ ដែលជាស្រុកកំណើតខាងប្រពន្ធ និងមានស្រុកកំណើតភូមិពានរោង ឃុំពានរោង ស្រុកស្វាយអន្ទរ ខេត្តព្រៃវែង មានប្រពន្ធ ជាកម្មការិនីរោងចក្រ និងមានកូនម្នាក់ក្នុងបន្ទុកគ្រួសារ ។ រីឯជនរងគ្រោះម្នាក់ទៀត រងរបួសធ្ងន់ បានបញ្ជូនទៅមន្ទីរពេទ្យភ្លាមៗ។

តាមប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តក្រឡុកស៊ីម៉ងត៍មួយគ្រឿង បានធ្វើដំណើរតាមមហាវិថី ឈ្នះ ឈ្នះ ក្នុងទិសដៅពីលិចទៅកើត លុះដល់ចំណុចកើតហេតុ បានបត់ឆ្វេងវង់ក្បាលសួនច្បារខណ្ឌចែកទ្រូងផ្លូវ ជ្រុលទៅបុកម៉ូតូជនរងគ្រោះ ម៉ាកហុងដាឌ្រីមសេ១២៥ ពណ៌ខ្មៅ ពាកស្លាកលេខ ភ្នំពេញ 1IE-5161 ដែលកំពុងធ្វើដំណើរក្នុងទិសដៅពីកើតទៅលិច ពេញទំហឹង ប៉ើងធ្លាក់ចូលប្រឡាយទាំងមនុស្ស ទាំងម៉ូតូ ស្លាប់ម្នាក់យ៉ាងរន្ធត់ និងម្នាក់ទៀតរបួសធ្ងន់ ខណៈមាន់២ក្បាលដែលយកមកពីស្រុកនោះ ក៏បានរបូតរួចបាត់ សល់តែផ្លែក្រសាំងមួយបេ ត្រាំងក្នុងប្រឡាយទឹក ជាមួយម៉ូតូនិងសាកសព ខណៈបុរសម្នាក់ទៀតរងរបួសធ្ងន់ធ្ងរ ត្រូវបានបញ្ជូនតាមរថយន្តសាមុយ ដឹកយកទៅកាន់មន្ទីរពេទ្យភ្លាមៗ ដើម្បីសង្គ្រោះជីវិត ។ ចំណែករថយន្តបង្ក បានបើករត់គេចខ្លួនបាត់ស្រមោលតែម្តង។

ក្រោយកើតហេតុ សមត្ថកិច្ចនគរបាលចរាចរណ៍ខណ្ឌ សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យកម៉ូតូទៅរក្សាទុក ដើម្បីស្រាវជ្រាវរករថយន្តបង្ក មកដោះស្រាយគ្នាតាមច្បាប់ និងប្រគល់សពឲ្យប្រពន្ធយកទៅធ្វើបុណ្យតាមប្រពៃណី ៕