រាជធានីភ្នំពេញ ៖ រថយន្តបែនដឹកទំនិញមួយគ្រឿង បានជ្រុលបុកជាមួយរថយន្តធន់ធំដឹកស៊ីម៉ង់ត៍ ខណៈរថយន្តដឹកស៊ីម៉ង់ត៍បើកបត់ត្រឡប់ក្រោយ បណ្ដាលឲ្យរថយន្តកូរ៉េក្រឡាប់ផ្ងារជើង ខណៈតៃកុងរថយន្តនិងអ្នករួមដំណើរ២នាក់ទៀត រងរបួសស្រាល កាលពីវេលាម៉ោង១១និង៣០នាទីថ្ងៃត្រង់ទី៣១ ខែសីហា ឆ្នាំ២០២១ នៅចំណុចម្ដុំផ្សារដើមគថ្មី តាមផ្លូវមហាវិថីឈ្នះឈ្នះ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។

ប្រភពព័ត៌មានបានឲ្យដឹងថា មុនពេលកើតហេតុ គេឃើញមានរថយន្ត ម៉ាកហ៊ីយ៉ាន់ដាយ ធន់ធំ ពណ៌ស ឆ្នូតលឿង ពាក់ស្លាកលេខ ភ្នំពេញ 3F-0466 ដឹកស៊ីម៉ង់ត៍ បានធ្វើដំណើរតាមបណ្ដោយមហាវិថីឈ្នះឈ្នះ ក្នុងទិសដៅពីលិចទៅកើត លុះមកដល់ចំណុចកើតហេតុ ក៏បានបួងចង្កូតបត់ឆ្វេងត្រឡប់ក្រោយ ខណៈពេលកំពុងបត់បានពាក់កណ្ដាលតួរថយន្ត ស្រាប់តែរថយន្តដឹកទំនិញមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3C-8065 ធ្វើដំណើរតាមបណ្ដោយផ្លូវមហាវិថីឈ្នះឈ្នះ ក្នុងទិសដៅពីកើតទៅលិច ក្នុងល្បឿនលឿន ខ្វះការប្រុងប្រយ័ត្នវ៉ាក់អើ ក៏ជ្រុលទៅបុកជាមួយក្បាលរថយន្តដឹកស៊ីម៉ង់ត៍ផ្នែកខាងស្ដាំ បណ្ដាលរថយន្តដឹកទំនិញក្រឡាប់ផ្ងារជើង តែសំណាងល្អក្នុងហេតុការណ៍គ្រោះថ្នាក់ចរាចរណ៍នេះគ្មាននរណាម្នាក់ រងរបួសធ្ងន់ធ្ងរអ្វីឡើយគ្រាន់តែរបួសស្រាលប៉ុណ្ណោះ។

ក្រោយពេលកើតហេតុ ខាងតំណាងរបស់រថយន្តដឹកស៊ីម៉ង់ត៍ បានមកសម្របសម្រួលជាមួយភាគីខាងរថយន្តបែនដឹកទំនិញ ដោយព្រមចេញសងថ្លៃខូចខាតដើម្បីបញ្ចប់រឿងតែម្តង ៕