ខេត្ត បន្ទាយមានជ័យ ៖ យោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានឲ្យដឹងថា អគ្គិភ័យមួយបានឆាបឆេះផ្ទះមួយខ្នង អស់ទាំងស្រុង កាលពីវេលាម៉ោង ៧និង២០នាទីព្រឹក ថ្ងៃទី១ ខែកញ្ញា ឆ្នាំ២០២១នេះ នៅខាងជើងភ្នំ ភូមិខ្លាកូនចាស់ សង្កាត់កំពង់ស្វាយ ខេត្ត បន្ទាយមានជ័យ។
សមត្ថកិច្ចបានឲ្យដឹងថា ផ្ទះដែលឆេះ នេះទំហំ ០៨គុណ១០ ម៉ែត្រ សង់ពីឈើប្រក់សង្ក័សី ជញ្ជាំងសង្ក័សីនិងឈើ (ខូចខាតទាំងស្រុង) ម្ចាស់ផ្ទះមានឈ្មោះ មុត ចន្ទថា ហៅ ចរិយា ភេទ ស្រី អាយុ ៤១ ឆ្នាំ (មានជំងឺសរសៃប្រសាទ ) ។
ចំណែកមូលហេតុ បណ្តាលមកការដុតធូបទានខ្វះការប្រុងប្រយ័ត្ន ព្រោះបើតាមការសាកសួរ អ្នកជិតខាង ម្ចាស់ផ្ទះខាងលើតែងតែដុតធូបទានក្នុងផ្ទះជាប្រចាំ ហើយដើរចោល ទើបបណ្តាលឲ្យឆេះសំលៀកបំពាក់ និងសំភារៈប្រើប្រាស់ក្នុងផ្ទះ ខូចខាតទាំងស្រុង។
ក្នុងនោះ ភ្លាមៗ កម្លាំងប្រចាំបញ្ជាររបស់អធិការដ្ឋាន ប៉ុស្តិ៍រដ្ឋបាលកំពង់ស្វាយ និងប្រជាពលរដ្ឋរស់នៅក្បែរនោះ ហើយប្រើប្រាស់រថយន្តពន្លត់អគ្គីភ័យរបស់អធិការដ្ឋានក្រុង ចំនួន ០១ គ្រឿង ប្រើប្រាស់ទឹកអស់ចំនួន ០១ រថយន្ត គ្រប់គ្រងបានទាំងស្រុង ៕
