រាជធានីភ្នំពេញ ៖ រថយន្តក្រឡុកស៊ីម៉ង់ត៍មួយគ្រឿង បានបើកបរក្នុងល្បឿនលឿនវ៉ាជែង ជ្រុលចង្កូតឡើងលើសួនច្បារពុះចែកទ្រូងផ្លូវ ទៅបុកបង្គោលភ្លើងបាក់រាបដល់ដី បណ្តាលឲ្យរងការខូចខាត កាលពីវេលាម៉ោង ២និង៤៥នាទី រសៀល ថ្ងៃទី១ ខែកញ្ញា ឆ្នាំ២០២១ នៅតាមបណ្ដោយផ្លូវជាតិលេខ៦អា ក្នុងសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេបានឃើញរថយន្តក្រឡុកស៊ីម៉ង់ត៍ មួយគ្រឿង ពណ៌ស ពាក់ស្លាកលេខ ភ្នំពេញ 5A-3327 ដោយបើកបរក្នុងទិសដៅពីជើងមកត្បូង ក្នុងល្បឿនលឿន ខណៈពេលដែលមកដល់ត្រង់ចំណុចខាងលើ រថយន្តក៏បានវ៉ាជែងជាមួយនឹងរថយន្ត មួយគ្រឿងទៀត ហើយជ្រុលរេចង្កូតឡើងលើសួនច្បារពុះចែកទ្រូងផ្លូវ និងបន្តទៅបុកបង្គោលភ្លើង ១ដើមបាក់រាបដល់ដីតែម្តង។ ក្រោយកើតហេតុ សមត្ថកិច្ចប៉ុស្តិ៍បានចុះមកដល់ទីតាំងកើតហេតុ និងបានធ្វើការឃាត់ខ្លួនអ្នកបើកបររថយន្តក្រឡុងស៊ីម៉ង់ត៍ខាងលើ ។

ភ្លាមៗសមត្ថកិច្ចនគរបាលប៉ុស្តិ៍បាក់ខែង បានធ្វើការទំនាក់ទំនងទៅសមត្ថកិច្ចជំនាញចរាចរណ៍ក្រុង ដើម្បីចុះមកធ្វើការវាស់វែង យករថយន្តក្រឡុកស៊ីម៉ងត៍ខាងលើ ទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នាតាមផ្លូវច្បាប់៕