ខេត្តព្រះសីហនុ៖ រថយន្ដកុងតឺន័រ១គ្រឿង បុករះម៉ូតូនិងរថយន្តសរុប២គ្រឿងទៀត បណ្តាលឲ្យរងការខូចខាត កាលពីវេលាម៉ោង ៥ល្ងាច ថ្ងៃទី០១ ខែកញ្ញា ឆ្នាំ ២០២១ លើផ្លូវជាតិលេខ៤ ចន្លោះគីឡូម៉ែត្រលេខ ១៨៥-១៨៦ ភូមិត្រពាំងស្អុយ២ ឃុំអណ្តូងថ្ម ស្រុកព្រៃនប់ ខេត្តព្រះសីហនុ ។

ប្រភពព័ត៌មានពីសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បានកើតឡើងរវាងរថយន្តកុងតឺន័រ០១គ្រឿង ម៉ាកpeterliet ពណ៌ស ពាក់ស្លាកលេខ ភ្នំពេញ 3D-1286 អ្នកបើកបរ (គេចខ្លួនបាត់) ក្នុងទិសដៅខេត្តព្រះសីហនុ-រាជធានីភ្នំពេញ លុះមកដល់ចំណុចកើតហេតុខាងលើបានបុកនឹងម៉ូតូ០១គ្រឿង ម៉ាក Zoomer ពណ៌ក្រហមលាយខ្មៅ ពាក់ស្លាកលេខ ព្រះសីហនុ 1E-5824 អ្នកបើកបរ (មិនទាន់ស្គាល់អត្តសញ្ញាណ) ដែលមានទិសដៅស្របគ្នា និងបានរេចង្កូតទៅបុករថយន្ត០១គ្រឿងទៀត ម៉ាកNissan navira ពណ៌ស ពាក់ស្លាកលេខ ភ្នំពេញ2AU-2961 អ្នកបើកបរឈ្មោះ សុង ពិសី ភេទប្រុស អាយុអាយុ៣៩ឆ្នាំ ទីលំនៅភូមិ១ សង្កាត់២ ក្រុង/ខេត្តព្រះសីហនុ បណ្តាលឲ្យរងការខូចខាត តែសំណាងគ្មាននរណាម្នាក់ រងរបួសនោះទេ ។

ក្រោយកើតហេតុសមត្ថកិច្ចបានធ្វើការវាស់វែង យករថយន្តនិងម៉ូតូទាំង៣គ្រឿង ទៅរក្សាទុក នៅអធិការរដ្ឋាននគរបាលស្រុកព្រៃនប់ ដើម្បីរង់ចាំភាគីពាក់ព័ន្ធចូលខ្លួនដោះស្រាយគ្នាតាមច្បាប់បន្តទៀត៕